Россиядин Гьукуматдин Председатель Михаил Мишустина уьлкведин фу чрадай кархайри продукт акъудунин производстводихъ галаз алакъалу харжийрин са кьадар пай эвез хъувунин къайдаяр тайинарнава. Кьилди къачуртIа, хабар гузвайвал, гьар са тонн фу ва ширин тинидикай чранвай куьруь вахтунда (вад суткада) хуьдай шейэр гьазурунай 2 агъзур манат эвездин пул гуда. Гьукуматдивай харжийрин эвез къачур карханайри суьрсетдин къиметар авайвал тун (дегишар тавун) лазим я.
Суткада тахминан 15 тонн фу чразвай гъвечIи карханайриз са вацран вахтунда гузвай эвездин пул тахминан 1 миллион манатдиз, суткада 60 тонндилай гзаф фу чразвай чIехи карханайриз — 3,6 миллион манатдиз барабар жеда.
Такьатар РФ-дин хуьруьн майишатдин ва недай суьрсетдин министерстводинни регионрин властрин арада кутIуннавай икьраррин бинедаллаз агакьарда.
Фу чрадайбуруз куьмек гунин гьакъиндай къарар недай суьрсетдин къиметар агъузаруниз талукь яз Гьукуматди гьазурнавай серенжемрик акатзава.
Алатай гьафтеда Гьукуматди Россияда продуктрин къиметар виниз финин вилик пад кьуниз талукь серенжемар кьабулнавайдакай малумарнай. Суьрсет акъудзавайбуру ва алишверишдин сетри шекердин ва набататрин ягълудин къиметар виле акьадайвал дегиш тавунин гьакъиндай икьрарар кутIунна.
Эгер продукт акъудзавайбуру къиметар агъуз тавуртIа, ягълу къецепатан уьлквейриз маса гунай цIийи харж (пошлина) кардик кутада (гьа са вахтунда ракъин цуькверин тумарикай хкудзавай ягълу патал адан кьадар 9-январдилай гьакIани хкаж жезва) ва РФ-диз нацIарикай хкудзавай шекер гъунай къачузвай харж къуватдай вегьеда.
Идалайни гъейри, 2021-йисан 15-февралдилай 30-июндалди Россияди уьлкведин сергьятдилай къецепатаз тухузвай къуьлуьн, мухан, силин ва гьажибугъдайрин кьадар сергьятламишзава ва къуьл маса уьлквейриз маса гуниз талукь харж кардик кутазва. Шекер, фу ва гъуьр гьазурзавайбуруз алукьзавай йисуз государстводин патай куьмек гуда. ГьакIни яшайиш патал важиблу са жерге шейэрин къиметрин вини кьилин кьадар тайинарун теклифзава.
«Лезги газет»
