РД-дин хуьруьн майишатдин ва недай суьрсетдин министерстводин делилралди, республикадин агропромышленный комплекс алай аямдин истемишунрив кьадайвал техникадалди таъминарунин кIвалахдин йигинвал, алатай йисарив гекъигайла, 2,5 сеферда гзаф я. 2020-йисан 11 вацран вахтунда санлай къачурла 510,9 миллион манатдин къимет авай хуьруьн майишатдин 373 машин техника, гьа жергедай яз 94 трактор ва техил кIватIдай 13 комбайн маса къачунва.
Къейдзавайвал, техника маса къачунин кардик йигинвал государстводин патай куьмек гун себеб яз акатнава. Дагъустанда региондин лизинг кардик ква, адан оператор “Дагагроснаб” АО я. ГьакIни суьрсет гьасилзавайбуру хуьруьн майишатдин техника маса къачуниз ийизвай харжийрин 50 процент республикадин бюджетдай субсидия яз эвез хъийизва. Хабар гузвайвал, алай йисуз федеральный лизингдин программадин сергьятра аваз агакьарзавай техникадин кьадарни гзаф хьанва.
РД-дин хуьруьн майишатдин ва недай суьрсетдин министерстводин делилралди, алай йисуз, шазан кьадардив гекъигайла, Дагъустандин багъларай кIватIнавай емишрин бегьердин кьадарни гзаф хьанва. ИкI, 24,4 агъзур гектар багъларай 181,1 агъзур тонн емишар кIватIнава, им 2019-йисан бегьердилай 7 агъзур тонндин гзаф я.
Республикадин багъларай тахминан 95 агъзур тонн ичер, 22 агъзур тонн шефтелар, 25 агъзур тонн хутар, 13 агъзур тонн машмашар, 11,4 агъзур тонн чуьхверар, 8 агъзур тонн субтропикрин емишар (хурмаяр), гьакIни 9,7 агъзур тонндилай гзаф пIиниярни шурван пIинияр кIватIнава.
Емишрин бегьердал гьалтайла виле акьадай хьтин нетижаяр, министерстводин делилралди, Мегьарамдхуьруьн, Сулейман-Стальский, Ахцегь ва Хасавюрт районрин багъманчийрихъ хьанва. Санлай къачурла, и районрал Дагъустандин умуми бегьердин 46 процент гьалтзава.
Къейдзавайвал, эхиримжи йисара республикада къалиндаказ цадай ва фад бегьердал къведай жуьредин багълар кутазвай майданар къвердавай артух жезва. ИкI, 2020-йисуз, пландик квай 916 гектардин чкадал, 1113 гектар чилера цIийи багълар кутунва. Абурукай 731 гектар фад бегьердал къведай жуьрединбур я.
«Лезги газет»
