29-мартдиз Дагъустандин Кьил Сергей Меликов Украинада кьиле физвай дяведин гьерекатра телеф хьайи дагъустанвийрин хизанрин векилрихъ галаз гуьруьшмиш хьана.
Республикадин Кьили абуруз башсагълугъвал гана ва дагъустанвийри чпин гьунарралди Урусатдин аскердин викIегьвални алакьунар къалурайди къейдна. “…Гадайри чи уьлкве патал хаталувал арадал гъизвай душманрихъ галаз женгера иштиракна. Абуру Ватандин вилик чпин хиве авай буржи, фашистрихъ галаз дявеяр тухвай чIехи бубайри хьиз, кьегьалвилелди, жуьрэтлувилелди тамамарна.
Ватан патал чанар къурбанд авунвай абурукай чи ЧIехи Гъалибвилин лайихлу ирсдарар хьанва. Чпин игитвилералди абуру вири дуьньядиз герек чIавуз дагъустанвияр хайи накьвар патал чанни гуз гьазур тирди къалурна.
Куьне халис ватанпересар чIехи авуна. Къе чна рикIел хкизвайбур Дагъустандин, вири Урусатдин дамах я! Абурун экуь къамат чи рикIерай садрани акъатдач”, — лагьана Сергей Меликова.
Гуьруьшдин вахтунда РД-дин Кьили хабар гайивал, Дагъустанда Украинада кьиле физвай гьерекатра телеф хьайи аскеррин хизанриз куьмекар гун патал махсус фонд арадал гъанва. Фондуниз республикадин бюджетдай 50 миллион манат пул чара ийидайвал я.
“И фондуниз хайи чилихъ рикI кузвай маса инсанрини куьмекар гудайдак за умудар кутазва. Ахьтинбур лагьайтIа — квехъ галаз санал куь дерт пайзавайбур — тIимил авач. Фондунай гьар са хизандиз 1 миллион манатдин кьадарда аваз пулдин такьатар ахъайда”, — алава хъувуна С.Меликова.
Ада гьакIни республикадин гьукумдин органриз магьрумвилер хьанвай хизанриз жуьреба-жуьре месэлаяр гьялунин карда алакьдай вири жуьредин куьмекар гуниз эвер гана. “Украинада телеф хьайибурун хизанар — диде-буба, уьмуьрдин юлдашар, веледар, мукьва-кьилияр — вири чи гуьзчивилик жеда ва абурувай чи къайгъударвилик умуд кутаз жеда”, — къейдна республикадин Кьили.
Агьмед Магьмудов
