Апрелдин вацра Кеферпатан Кавказдин регионра чартерриз (асул гьисабдай туроператорри тешкилзавай самолетрин рейсер) талукь туризмдин махсус программа кардик акатда. Идакай Пятигорск шегьерда уьлкведин экономика вилик тухунин жигьетдай кьиле фейи форумдал Ростуризмдин регьбер Зарина Догузовади хабар гана.
З.Догузовадин гафарай малум хьайивал, сифте нубатда программа Дагъустанда кьилиз акъудиз гатIунда. Сад лагьай рейсерни Москвадай Махачкъаладиз кардик акатда.
“Чна чартеррин программадин сергьятар гегьеншарзава. ЦIи туризмдин сад лагьай чартерри Кеферпатан Кавказдиз лув гуда. И жигьетдай чна кьве туроператордихъ галаз икьрарар кутIуннава. Сад лагьай чартерди 30-апрелдиз Москвадай Махачкъаладиз лув гуда”, — лагьана З.Догузовади.
Адан гафарай гьакIни малум хьайивал, гьелелиг “Москва-Махачкъала” маршрутда 10 рейс фикирда кьунва. 10-июндилай чартерри Грозный шегьердизни лув гуда.
РикIел хкин, Пятигорскда кьиле фейи форумда Дагъустандай чIехи делегациядини иштиракна. Аник РД-дин Гьукуматдин Председатель Абдулмуслим Абдулмуслимов, республикадин транспортдин ва рекьерин майишатдин, промышленностдинни алишверишдин, туризмдин ва НХП-дин рекьяй вилик финин министрар — Жамбулат Салавов, Низам Халилов, Эммин Мерданов, маса ведомствойрин векилар, РД-дин Халкьдин Собранидин депутатар, карчияр квай.
«Лезги газет»
