ДАГЪУСТАН — ХАЛКЬАРИН ДУСТВАЛ
РД-дин милли политикадин рекьяй министр Татьяна Гамалеян регьбервилик кваз Къайтагъ райондин администрацияда, граждан общество туькIуьрунин ва 2025- йисалди РФ-дин государстводин милли политикадин стратегия РД-дин муниципальный тешкилатра уьмуьрдиз кечирмишунин важиблу месэлайрай семинар-совещание кьиле фена.
Мярекатда республикадин Кьиблепатан округда РД-дин Кьилин патай тамам ихтиярар ганвай векил Энрик Муслимова, РД-дин милли политикадин рекьяй министрдин заместитель Арсен Магьмудова, граждан обществодин къурулушрихъ галаз кIвалахдай отделдин начальник Бахтияр Магьмудова, Кьиблепатан Дагъустандин районрин делегацийри ва теклифнавай маса ксари иштиракна.
“Къайтагъ район” муниципалитетдин кьил Алим Темирбулатова мугьманар тебрикна ва гаф Татьяна Гамалеяз гана.
— Россияда 193 халкь ава. Дагъустанда ата-бубайрилай кьулухъ бинелу 33 халкь, са хизан хьиз, яшамиш жезва. Чи халкьарин жуьреба-жуьрвилин ва садвилин и чешнедал чна лайихлудаказ дамахзава. Эхь, дуьньядин гзаф маса уьлквейрилай тафаватлу яз, Россиядин гьукуматди пара четин ва дуьз рехъ хкянава. Са патахъай, чна вирида саналди гужлу государство тешкилзава (чун гьар сад са миллетдин векил ятIани, санлай Россиядин са халкь я), муькуь патахъай, гьардаз вичин чIал, меденият, милливал хуьдай мумкинвал ава.
Халкьарин арайра авай алакъаяр чIурун, зайифарун патал душманар фадлай алахънава. Къанажагълувал, бубайрин весийриз вафалувал къалурун яз, чун вири къуватралди Дагъустандин ва Россиядин сергьятра халкьарин арада чуьруькар тахьун патал чалишмиш жезва. Чи виридалайни еке ва багьа девлет халкьарин дуствални садвал тирди аннамишна хьиз, граждан обществодин вири къурулушарни общественный тешкилатар — Общественный палата, агъсакъалринни ветеранрин, гьакI дишегьлийрин советар, жегьилрин гьар жуьре тешкилатар кардик кутуна кIанда. Граждан дурумлу общество туькIуьрунин карда абур властдинни халкьдин арада авай важиблу къуватар я. Чна кьилин фикир жегьилриз ватанпересвилин тербия гунални желбун важиблу я. Вучиз лагьайтIа, граждан общество дурумлудаказ хуьн жегьилрин тербиядилай аслу жезва. Дугъри я, и месэлайриз талукь яз саки вири районра махсус планар ава, амма абур кьиле тухун патал чкадин бюджетрай 1000 манат пулни тайинарнавач, — лагьана министрди.
РД-дин милли политикадин рекьяй министрдин заместитель Арсен Магьмудов республикадин Общественный палатадинни дишегьлийрин советрин ва районра абурун хилерин кIвалах активламишун лазим тирдакай, гьакIни яшамиш жезвай чка дегишарна, атанвай мигрантрикай рахана. “Алай вахтунда Россияда 2 миллиондилай артух, Дагъустанда, тахминан, 47 агъзур мигрант ава. Чкадин шартIаривни къайдайрив вердишарун патал абурухъ галаз мукьуфдивди кIвалахна кIанда”,- къейдна ада.
— Граждан дурумлу ва секин общество арадал гъунин месэла халкьди властдиз ихтибар авунин дережадилай пара аслу я. Месела, СП-рин, муниципалитетрин администрацийри бюджетдин харжияр СМИ-рин такьатрай ачухдиз малумарзавач. РФ-дин Законди истемишзавайвал, инсанриз бюджетдин пулар гьикьван аватIа ва абур гьукумдарри гьи рекьериз харжзаватIа чир хьун лазим я, — алава хъувуна Энрик Муслимова.
Ачух суьгьбетрин тегьерда кьиле фейи мярекатда веревирдзавай месэлайрай чкайрал кьиле тухузвай кIвалахдикай Кьурагь райондин ветеранрин Советдин председатель Фахрудин Мирзоев, Сулейман-Стальский райондин Общественный палатадин председателдин заместитель Ягъибег Ягъибегов, Ахцегь райадминистрациядин кьилин заместитель Роберт Гьамзаев (ада Дагъустандин халкьарин дуствилин алакъаяр мягькемарунин карда райондин Общественный палатадин чешнелу кIвалахдикай ва лезгийрин игитвилин “Шарвили” эпосдин суварин мумкинвилерикай лагьана), Дахадаев, Дербент, Докъузпара, Хив районрин кьилерин заместителар Абдула Мегьамедов, Садир Эмиргьамзаев, Къазихан Магьадинов, Ярмет Ярметов, Мегьарамдхуьруьн, Рутул районрин ва Дербент шегьердин общественный палатайрин председателар тир Агъадаш Нагъметулаев, Надир Акимов, Айваз Алиханов рахана.
Абурун таъсирлу рахунризни кьиметлу теклифриз милли политикадин рекьяй министерстводин векилри баянар гана. Эхирдай Татьяна Гамалея мярекатдин иштиракчийрин бязи суалриз жавабар гана ва семинар-совещанидин нетижаяр кьуна.
Дашдемир Шерифалиев
