КIелзавайбуруз фадлай таниш шаир, журналист, РФ-дин писателрин союздин член Мукаил Агьмедован къелемдикай хкатнавай мад са цIийи ктаб и мукьвара Махачкъалада кардик квай “Формат” чапханада чапдай акъатна.
“Камбар булах”, “Гьахъунин ван”, “Зи умудрин елкен”, “Бинейрин кьилив”, “Руьгьдин хирер” — ибур икьван чIавалди Мукаил Агьмедович Агьмедован гъиликай хкатнавай, кIелчийрин патай разивилин фикирар арадал атанвай ктабар я.
Нубатдин “Фикиррин нурар” ктабда гьатнавай эсерар 2018-2020-йисара теснифнавай цIийибур я. Эсерралди шаирди къвезвай несилдиз ахлакь, эдеб хуьниз эвер гузва. Ватанпересвилиз талукьарнавай шииррини кьетIен чка кьазва.
Жергедин агьалияр кIеве твазвай ришветбазарни лутуяр, халкьдин месэлайрив бейтерефвилелди эгечIзавай гьукумдарарни жавабдарар русвагьунин жигьетдай шаирдин къелемди иллаки хцивал къалурзава:
ГалтIам ягъиз дугърибуруз,
Рехъ гайила угърибуруз,
Шив – кьулухъ, лам вилик хьайла,
Дерт тушни бес вирибуруз?
Малум тирвал, чкайрал югъ-къандавай бейкарвал артух жезвайвиляй алай девирда лезги жегьилар са къатда къариблухриз физва. Шаирдик и делилдини велвела кутазва:
Къулан цIаяр хкадариз,
Ирс, ивирар акIадариз,
Авач лугьуз ина кIвалах,
Физва гъурбат аваданиз.
Муькуь ктабра хьиз, цIийи ктабдани чи чIалан девлет ава. М.Агьмедован шииратдикай гегьеншдиз веревирдер ийиз жеда. Амма адакай лезет хкудун патал шииратдал кьарубуруз чна ам кIелун теклифзава. Бажарагълу шаирдихъ яратмишунрин рекье мадни агалкьунар хьурай!
Лезги Фетгьуьллагь
