И мукьвара РД-дин хуьруьн майишатдин ва недай суьрсетдин министр Абзагьир Гьуьсейнов Сулейман-Стальский райондиз кIвалахдин рекьяй мугьманвилиз фена.
Министерстводин къуллугъчияр ва Сулейман-Стальский райондин кьил Нариман Абдулмуталибов галаз ада Агъа СтIал-Къазмайрин ва Алкьвадрин юкьван образованидин мектебрин цIийи дараматар эцигзавай чкаяр, гьакIни инвестицийрин зурба “СтIалрин багълар” проект уьмуьрдиз кечирмишзавай тегьер ахтармишна.
РикIел хкин, алай вахтунда Сулейман-Стальский районда “Хуьрерин мулкар вири патарихъай виликди тухун” госпрограммадин сергьятра аваз винидихъ тIвар кьунвай хуьрера мектебрин цIийи дараматар эцигзава.
Райондиз программада иштиракдай мумкинвал “Полоса” ООО-ди “СтIалрин багълар” проект гъиле кьунин ва агропромышленный комплексдиз 500 миллион манатдилай артух кьилдин ксарин инвестицияр желб авунин, объектар эцигуниз талукь проектдинни сметадин документация ва гьакIни проектдиз меценатрин патай куьмек агакьунин заминвилер хьунин нетижада арадал атанва.
Агъа СтIал-Къазмайрин СОШ-дин цIийи дарамат эцигунин проектдинни сметадин документация гьазуруниз такьатар Салман Бабаева чара авуна. Эцигунрин кIвалахрин санлай къачур кьадар 423, 331 млн манатдиз барабар я. 90 процент финансар — федеральный, 5 процент республикадин бюджетрай ва бюджетдилай къерехдай тир фондарай чара ийизва. Эцигунрин кIвалахар пудратдин тешкилат тир “Дагсвязьинвест-1” ООО-ди кьиле тухузва. Объект тамамдаказ 2021-йисуз вахкудайвал я.
Алкьвадрин СОШ-дин цIийи дарамат эцигунин кIвалахрин санлай къачур къимет 122, 482 млн. манатдиз барабар я. Алай вахтунда объектдал кьве мертеба хкажнава, спортдин зал эцигнава. Мектебда махсусдаказ тадаракламишнавай кабинетар ва классар хьун фикирда кьунва. Эцигунрин кIвалахар алай йисан эхирдалди тамамарда.
Абзагьир Гьуьсейнова тамамарнавай кIвалахриз хъсан къимет гана. Ам эцигунрин кIвалахрин ерилувилелай ва абур кьилиз акъудзавай тегьердилай рази яз амукьна.
Идалай гуьгъуьниз министерстводай тир делегация “Полоса” ООО-дин мулкунал рекье гьатна. Ана абуру лап фад арадал къведай ва къалиндаказ цанвай жуьредин ичерин ва фундугърин багълар, гьакIни майишатдин къенепатанбур тир дигидай системаяр ахтармишна.
Райондин кьили къейд авурвал, инвестицийрин проектдихъ неинки Сулейман-Стальский район, гьакIни вири республика патал еке важиблувал ава. “Проектди “Полоса” чкада авай, икьван чIавалди гадарнавай гьалда аваз хьайи, дигидай яд бес тежезвай хуьруьн майишатдин чилер ишлемишиз башламишдай, 1000-далай виниз кIвалахдин чкаяр тешкилдай, базарда гьуьжетиз жедай хуьруьн майишатдин суьрсет гьасилдай ва муниципальный бюджетдин хсуси къазанжияр артухардай мумкинвал гузва”, — лагьана ада.
Делегация производстводихъ галаз таниш жезвай вахтунда чеб гьялун патал государстводин патай куьмек лазим бязи месэлаярни къейдна. Месела, емишар хуьдай гьамбархана эцигун патал алай аямдин трансформатордин станция эцигун лазим я. ГьакIни яд гузвай къаналар бинедилай ремонт хъувуна кIанзава. Санлай къачурла, А.Гьуьсейнов тамамарнавай кIвалахрилай рази яз амукьна.
«Лезги газет»
