10-апрелдиз чи арадай машгьур алим, кавказовед, диалектолог, филологиядин илимрин доктор, РАН-дин ДНЦ-дин чIалан, эдебиятдин ва искусстводин институтдин илимдин кьилин къуллугъчи Фаида Абубакаровна Гъаниева акъатна. Адан 88 йис тир.
Ф.А. Гъаниева 1937-йисан 14-мартдиз Ахцегьа дидедиз хьана. Филологиядин факультет акьалтIарайдалай кьулухъ саки 7 йисуз жуьреба-жуьре мектебра муаллим яз кIвалахна. 1967-йисуз ДГУ-да аспирантурадиз гьахьна, 1980-йисуз Тбилисидин госуниверситетда — филологиядин илимрин кандидатвилин, 2005-йисуз Москвада, РАН-дин чIалан институтда, докторвилин диссертацияр хвена.
Ф.А. Гъаниевадин къелемдикай лексикологиядин, лексикографиядин, лезги чIалан диалектрин, грамматикадин месэлайриз талукьарнавай илимдин цIудралди макъалаяр хкатна. Алимди кьилди хиналугъ чIалан кьетIенвилерни ахтармишна. Санлай къачурла, ам жуьреба-жуьре журналра чапнавай илимдин 200-далай виниз макъалайрин автор, «Урус ва лезги чIалан гафаргандин» соавторрикай сад я.
Вичин яшаризни килиг тавуна, Ф.А. Гъаниевади, лезги халкьдин милли медениятдиз, эдебиятдиз талукьарна, Махачкъалада кьиле физвай вири мярекатра иштиракзавай, абур чешнелудаказ тешкилуник вичин пайни кутазвай. Эхиримжи йисара алимди лезги чIалан диалектологиядин гафаргандин винел кIвалахзавай. Гьайиф хьи, вичин вири уьмуьр хайи чIал чируниз бахшай и баркаллу дишегьлидивай тIвар кьунвай гафарган кхьена акьалтIариз хьанач.
Хейлин йисара илимдин рекье бегьерлудаказ кIвалахунай Ф.А. Гъаниевадиз СССР-дин АН-дин Президиумдин, РД-дин Гьукуматдин гьуьрметдин грамотаяр, «Честь и гордость Дагестана — Золотой орел» орден, алим Мегьамед Гьажиеван тIварцIихъ галай, «Шарвили» эпосдин премияр гана. Ам зегьметдин ветеран, РД-дин илимдин лайихлу деятель тир.
«Лезги газетдин» редакциядин коллективди, Фаида Абубакаровна Гъаниева рагьметдиз финихъ галаз алакъалу яз, адан багърийриз, вири мукьва-кьилийриз башсагълугъвал гузва. Алимдин экуь къамат чи рикIера амукьда.
