12-апрелдиз чав чIулав хабар агакьна: 77 йисан яшда аваз Махачкъалада машгьур алим Шайдабег Айдабегович Мирзоев рагьметдиз фена. Ам РФ-дин халкьдин образованидин отличник, РФ-дин кьилин пешекарвилин образованидин сейли къуллугъчи, РД-дин илимдин лайихлу деятель, ДГПУ-дин профессор, А.Тахо-Годидин тIварцIихъ галай ДНИИП-дин педагогикадин сектордин заведующий тир.

Шайдабег Айдабегович 1948- йисуз Азербайжан ССР-­дин Сумгаит шегьерда ди­де­­диз хьана. 1966-йисуз ада СтIал Сулей­ма­нан райондин Ши­­хид­хуьруьн мек­теб, 1967-йисуз Махачкъаладин 3-нумрадин ПТУ, 1975-йисуз ДГУ-дин филологиядин факультет тафаватлудаказ акьалтIарна. 1987-йисуз Дондал алай Рос­товда ада педагогикадин илимрин кандидатвилин диссертация хвена, 2000-йисуз Ш. Мирзоеваз РФ-дин образованидин министерстводин къа­­рардалди педагогикадинни психологиядин рекьяй профессорвилин дережа гана. Ам академик Г. Волкован тIварцIихъ галай медалдин ва хейлин маса шабагьрин сагьиб тир.

Ш. Мирзоева вичин уьмуьрдин чIехи пай халкьдин педагоги­ка, Дагъустандин халкьарин ме­де­ниятар, адетар ахтармишуниз­ бахшна. Адан къелемдикай жуь­реба-жуьре йисара чпиз тешпигьбур авачир ктабар, учебникар хкатна: «Халкьдин педагогика: тербиядин къайдаяр ва метлеб», «Дагъустандин халкьдин пе­дагогика», «Дагъустандин халкьарин медениятар ва адетар» 4 ва 8-9-классар патал учебникар, Р. Гьайдаровахъ галаз санал кхьей «Лезги чIалан омоним­рин словарь» ва хейлин масабур.

РФ-дин ВАК-дин изданийра­ ада илимдин 250-далай гзаф макъалаяр чапна. Республика­дин дережадин урус ва лезги чIаларал акъатзавай газетра, гьа жергедай яз «Лезги газетдани» тербиядиз, чIалаз, милли медениятдиз, адетриз ва халкьдин яратмишунриз талукь адан метлеблу макъалаяр мукьвал-мукьвал акъатзавай.

Агъайнавили, сабурлувили, камаллувили, вичин кIвалахдиз вафалувили Шайдабег Айдабегович вирибуруз сейли авунвай. ТIвар-ван авай алим чи арадай акъатун лезги меденият, эдебият ва чIал патал еке магьрумвал я.

«Лезги газетдин» редак­циядин коллективди адан багъ­рийриз, мукьва-кьилий­риз баш­сагълугъвал гузва.