Мукьвара Хорватиядин меркез Загреб шегьерда 15 йисал къведалди яшда авай жаванрин арада кьуршахар кьунин пуд жуьредай (азаддаказ, грекринни римлуйрин жуьреда ва дишегьлийри) Европадин кIвенкIвечивал патал акъажунар кьиле фена. Гьайиф хьи, чи уьлкведал илитIнавай санкцияр себеб яз, Россиядин хкянавай командади и акъажунра иштиракнач. Амма лезги кьегьал хци, Азербайжандин хкянавай командадик кваз иштиракай Саид Пашаева (ери-бине — Къусар райондин Ясаб хуьряй) 85 кг-дал къведалди заланвал авай спортсменрин арада къизилдин медаль къазанмишна.
Къейд авун лазим я хьи, Саида вич гьасиррал лап инанмишвилелди тухвана — вири 4 бягьсни вахт амаз акьалтIарна. ИкI, финалдиз акъатдалди адаз Илья Соболев (Эстония) -11:0, Гигия Лукунидзе (Гуржистан) — 10:0, Хасан Дюр (Туьркия) — 10:0, финалдани Литвадай тир Рокас Милиаукас 6:0 гьисабралди кумукьна.
“За акъажунриз хъсан гьазурвал акунвай. Бягьсер зун патал четинбур хьанач. Умудлу я, чIехи гъалибвилер захъ инлай кьулухъни жеда. Зи мурад — дуьньядин ва Олимпиададин чемпион хьун я”, -лагьанва са интервьюда чи ватанэгьлиди.
Къуй ви мурадар кьилиз акъатрай, Саид! Чи халкьдин тIвар хкажзавай кье-гьалар чахъ гзаф хьурай!
Регина Семедова
