Гила МФЦ-дин идарайра эвленмиш хьунин гьакъиндай регистрация ийиз жезва. Эвленмиш хьунин гьакъиндай шагьадатнама кьве инсан гъуьлни паб тирди тестикьарзавай официальный документ я.
Шагьадатнама къачун патал гележегдин уьмуьрдин юлдашар паспортарни гваз МФЦ-диз фена кIан жеда. Госпошлина МФЦ-да терминалдин куьмекдалди гудай мумкинвал ава.
Суал-жаваб
Инсанри хсуси документар ламинировать ийизвай дуьшуьшар тIимил гьалтзавач. Гьакъикъатда и кар эсиллагь кьилиз акъудна кIанзавайди туш.
– Гьихьтин документар ламинировать авуна виже къвезвач?
Жаваб: дидедиз хьайивилин гьакъиндай шагьадатнама; эвленмиш хьунин гьакъиндай шагьадатнама (ва я къуватдай вегьенвай шагьадатнама); хвавиле, рушвиле кьабулунин гьакъиндай шагьадатнама; бубавал тайинарунин гьакъиндай шагьадатнама; тIвар дегишарунин гьакъиндай шагьадатнама; кьейивилин гьакъиндай шагьадатнама; ОМС-дин полис.
– Ихьтин документар вучиз ламинировать авуна виже къвезвач?
Жаваб: «Ватандашвилин гьалдин актарин гьакъиндай» 143-нумрадин федеральный къанундин 9-статьядал асаслу яз, ватандашвилин гьалдин актар квахьун, чIур хьун, куьгьне хьун, печать ва текст кIелиз тахьун, гьакIни ламинирование авун – и вири дуьшуьшра къейднавай документар дегишар хъувун ва тикрарна вахчун герек я.
МВД-дин хиляй
МФЦ-дин идарадай кьилиз акъудиз жедай МВД-дин къуллугърин (услуги) сиягьдик ибур акатзава: гьамишан регистрация; вахтуналди тир регистрация; ватандашар регистрациядин учетдилай алудун патал документар кьабулун; 14 йис тамам хьайила сифте паспорт къачун; 20 ва 45 йисарин яшариз акъатайла, РФ-дин паспорт дегишарун патал документар кьабулун; судди кар атIанвайди я ва я туш лагьай справка; наркотикар квай затIар ишлемишунай суддик акатнавач лагьай справка.
«Лезги газет»
