Авай са хцикай магьрум хьун. Свасни тагъанвай. Хсуси хизан кутун тавунвай. Вилик къазанмишдай еке дережаяр кумай… Ихьтин дерт эхун, адакай азад хьун гьич фикирдиз гъиз жедай кар туш. Росгвардиядин Дагъустанда авай управленидик акатзавай Махачкъаладин спецназдин кьилдин дестедин къуллугъчи, майор Руслан Примован диде Аидадин, буба Жамалдинан дерт пара заланди, рикI гьар легьзеда туькьуьларзавайди, рагъ алай югъни чIулаварзавайди я.
Махсус серенжемда гьа сифте йикъалай иштиракай, кар алай ва четин везифаяр баркалла къведайвал тамамарай офицер, командир душмандин ракетайрин гуьллейрин хаталувилик акатай вичин юлдашар къутармишиз фейила, телеф хьана. Игит хциз хуьре памятник ачухна, адан призар патал спортдин акъажунар тешкилзава.
Багърийрин тIал квахь тийидайди я кьегьалдин мукьвабуру чал Руслан Примован уьмуьрдиз, къуллугъдиз талукь цIийи малуматар агакьарна.
Хуьруьн юкьван школа куьтягьайла, Руслан 2010-йисуз Россиядин къенепатан кьушунрин Пермдин военный институтдик экечIна. Са патахъай шартIар къулайбур, муькуь патахъай кIевибур, муракаббур тир. Къайда, низам хуьн, командиррин тапшуругъар ян тагана тамамарун, яракьар чирун, хъсандиз кIелун, вердишвилерин серенжемда чешне къалурун, курсантдин везифайрив жавабдарвилелди, гьакъисагъвилелди эгечIун… Руслан Примов кIелзавай вири йисара сифтегьан жергейра жез алахъна. И кар адалай алакьни авуна. Институт ада вини дережадин къиметар аваз куьтягьна.
2015-йисуз жегьил офицер Астрахандин спецназдин дестедиз ракъурна ва ам техникадиз талукь месэлаяр гьялзавай взводдин командирвиле тайинарна. КьетIен везифаяр, тапшуругъар тамамарзавай частуна къуллугъ авун хаталу дуьшуьшрихъ галазни алакъалу жезвайди я. Примова кIвалах гьар сеферда я вичиз, я гъилик квай аскерриз зиян хкат тийидайвал тешкилзавай ва тапшуругъ тирвал кьилиз акъудзавай. ИкI тирвиляй ада вахтунилай вилик краповый берет алукIдай ихтияр къазанмишна. Спецназдин закондалди, им и частарин лап кьилин дережа я. Чешнелу, гьахълу, викIегь офицердиз командиррин ва аскеррин арада еке гьуьрмет авай.
Украинадин миллетбазри зулумдик кутунвай агьалийриз халис азадвал багъишунин макьсад вилик эцигайла, дяведин махсус серенжемдив эгечIайла, Россиядин армиядихъ галаз Примовни Донбассдиз фена. 2022-йисан 25-февралдилай ада вичин дестени галаз лап четин, хаталу чкайриз физ, миллетбазар тергзавай, хуьрер, даяхдин пунктар азадзавай.
Нубатдин тапшуругъ кьилиз акъуддайла, Примован десте хелвет чкада чуьнуьх хьанвай душмандин гуьллейрин харцик акатна. Месэладин гъавурда гьатай командирди гьасятда миллетбазрин гьужумдиз жаваб гудай уюн тешкилна, аскерриз дуьзгуьн буйругъар гана. Бязи юлдашрал хирер хьанатIани, Примован дестеди душмандин гьужум алудна, сагъ амукьайбур катдай чкадални гъана.
«Азовсталь» къачун патал къизгъин женгера викIегьвилелди иштиракай ва ахпа 12 колоннадикай ибарат 2000 есир сагъ-саламатдиз лазим чкадиз агакьарай офицердин лайихлувилер «Жуьрэтлувиляй» орден гуналди къейдна.
Мукьва-кьили Сувар Абдулгъаниевади суьгьбет авурвал, Руслан отпускдиз хтайла, ада саки вири багърийрал кьил чIугуна. Хуьре це лагьанвай свас авай. КIвалерни маса къачуна, хъсандиз ремонтни авунвай. Ана хъийидай куьлуь-шуьлуь кIвалахар амазмай. «Абур чна, чан дидедин, вун мад сеферда хкведалди куьтягь хъийида», — лагьанай Аидади. Багърийри мехъерризни гьазурвилер аквазвайди тир. Амма…
Запорожьедин областда душмандин артиллериядин гуьллейрин харцик Россиядин са рота акатна. Гзафбурал хирер хьана. И кардикай хабар хьайила, Руслан Примов вичин дестени галаз юлдашар къутармишиз фена. Миллетбазрин тупари мад кIвалахна. Руслана тади гьалда чи аскерар саламат чкайрихъ акъудзава, бронемашиндиз язава. Ракета аватна, хъиткьинна, са шумуд аскер чилел ярх хьана. Абурухъ галаз Русланни. Ам къутармишдай мумкинвал амукьнач.
2023-йисан гатун июлдин варз Примовар патал чIулавди хьана. Хизан авай са хцикай магьрум хьана. Амма адан къени, регьимлу крар я командиррин, я аскеррин, я Запорожьедин агьалийрин рикIелай алатзавач. Руслана куьмек гайи инсанрилай Примоврин хизандиз чарар хквезва.
Тагьирхуьруьн-Къазмайрилай тир майор, «Жуьрэтлувиляй» кьве ордендин сагьиб, махсус дестедин командир Руслан Жамалдинович Примовахъ офицервилин чIехи дережаяр къазанмишдай алакьунар авай. Абурукай ада махсус серенжемдани менфят къачуна ва уьмуьр баркаллу кардиз бахшна. Гьавиляй ам чи халкьди рикIелни хуьда ва акьалтзавай несилдиз чешне язни къалурда.
Хийир Эмиров
