Са жерге лутувилерай
Алай йисан 7-ноябрдиз Махачкъаладин Советский райондин полициядин къуллугъчийри тайинарайвал, 39 йисан яшда авай меркезви дишегьлиди, алцураруналди, 43 йисан яшда авай чкадин агьалидин 350 агъзур манат вичиз «кьисметарна». Идакай РД-дин МВД-дин пресс-къуллугъди хабар гузва.
Полицейскийри шак фенвайди отделдиз хкана. Дишегьлидин гафаралди, ада махачкъалави итимдиз адан руш колледждик кутунин карда куьмек гун хиве кьуна. Вичин «къуллугъ» кьилиз акъудун патал ада винидихъ къалурнавай кьван пул истемишна.
Малум хьайивал, ихьтин жуьредин «кьуьруькдин» куьмекдалди дишегьлиди шегьердай тир мад кьве дишегьли ягъалмишвилера туна ва абурун аялар чирвилерин идарада кIелуник кутун патал 700 агъзур манат пул къачуна. ЧIуру ниятар авай дишегьлиди хиве кьурвал, къачур пул ада вичин хсуси игьтияжриз харжна.
И делилдай суд-дуван авун патал материал кIватIнава.
Улакь гвайди чуьнуьх хьана
Алай йисан 9-ноябрдиз «Астрахань-Махачкъала» федеральный шегьреда, Тарумовский районда, рекьин патавай тахминан 45-60 йисан яшда авай хьтин итимдин мейит жагъана. Виликамаз малумарай делилралди, ам машинди ягъунин нетижада кьена.
РД-дин Госавтоинспекциядин къуллугъчийри ДТП хьайи чкадилай чуьнуьх хьайи водитель тайинарна. Отделдиз 28 йисан яшда авай Къаякент райондин агьали, пар тухудай «Volvo» улакьдин водитель хкана. Шак фенвайди РФ-дин УПК-дин 91-статьядин бинедаллаз кьунва. Машиндик акатна кьейи кас вуж ятIа чирзава.
Чи мухбир
