“Лезги газетдиз” РД-дин образованидин ва илимдин министерстводин пресс-къуллугъди хабар гайивал, алай йисуз республикада 300-лай виниз етим аялар яшайишдин кIвалералди таъминарда. И месэла гьялун патал 257 миллион манат пул чара ийида.
Мукьвара РД-дин Гьукуматдин Председателдин заместитель — РД-дин образованидин ва илимдин министр Уммупазиль Омаровадин регьбервилик кваз кьиле фейи совещанидал малум хьайивал, етим аялар патал маса къачудай кIвалерин ери министерстводин векилри вири терефрихъай ахтармишда. Совещанидин кIвалахда Дагъустандин муниципалитетрин кьилери ва образованидин управленийрин начальникри иштиракна.
— Чна тайин макьсаддихъ элкъуьрна чара авунвай пулдин такьатар менфятлудаказ ишлемишун патал куьне кьабулзавай серенжемрин жигьетдай гьар гьафтеда анализ кьиле тухузва, — лагьана У.Омаровади. — Министерстводихъ галаз санал куьнени аялриз маса къачузвай кIвалерин еридал гуьзчивал тухвана кIанда. Абур вири къайдайрив ва истемишунрив кьадайбур хьун лазим я. И месэла гуьзчивилик кутунвай гьар са касдин хиве неинки чара авунвай пулдин такьатар вахтунда ва менфятлудаказ ишлемишунин, гьакIни етим аялриз гузвай кIвалерин еридин жигьетдайни жавабдарвал ава, — алава хъувуна вице-премьерди.
Къейд ийин хьи, алай вахтунда Дагъустанда государстводи кIвалер чара авуна кIанзавай аялрин кьадар 2867 касдиз барабар я.
Чи мухбир
