Дагъустанди  2018-йисуз  Дербентда чиркин ятар михьи хъийидай тадаракар  эцигун патал 102,7 миллион манат рекье твада, хабар  гузва региондин эцигунринни ЖКХ-дин министерстводай. Чара ийизвай финансрин санлай къачур кьадардикай 97 миллион манат республикадин бюджетдай я,  ЖКХ-дин объект эцигунин кIвалахар лагьайтIа, 2019-йисан кьвед лагьай паюна акьалтIарун  пландик кутунва.

“Михьи ийидай тадаракар ишлемишиз башламишуни  шегьерда экологиядин гьалар  хъсанарун лазим я. Эцигзавай­ тадаракрихъ суткада 25 агъзур кубометр чиркин ятар михьдай гужлувал жеда”, — хабар гузва министерстводай.

Абур эцигунин кIвалахар тайин макьсаддихъ элкъуьрнавай “Россиядин Кьиблепад” федеральный  программадин сергьятра аваз 2008-йисалай  кьиле физва ва “Кеферпатан Кавказдин федеральный округ 2025-йисал кьван вахтунда виликди тухун”  госпрограммадик кутунва.

Гьа са вахтунда региондин властрин  планрик Каспийск шегьерда эцигзавай ва чпихъ суткада 60 агъзур м3 чиркин ятар михьи ийидай гужлувал авай тадаракар 2018-йисан эхирдалди ишлемишиз вахкун ква.

Чи мухбир