Простатит ва аденома. Ибур кьведни эркекар гзаф гьелекзавай азаррин тIварар я. Гьеле эркек аял дидедин бедендик кумаз адан беденда, муькуь органрихъ галаз санал, простатани (предстательный железа) арадал къвезва. Простата авачир гьич са эркекни авач. И орган гуьнгуьникай хкатайла, ада вичин везифаяр дуьз кьиле тухун тавурла, простатит азар арадал къвезва.
И азардиз вахтунда фикир тагайтIа, вилик пад кьун тавуртIа, ам аденомадиз элкъвезва. Гьавиляй адаз “простатадин аденома” лугьузва. Кваз такьуртIа, аденома чIуру азардизни (рак) элкъуьн мумкин я. ГьакI хьайила, гьуьрметлубур, цик экечIайдалай кьулухъ, кьеженвай парталар дегишна, беден чимиз хвена кIанда. ТахьайтIа простатит азар пайда хьуниз рехъ ачух жеда, герен-герен къециз экъечIуниз мажбур жеда, са 5 декьикьани алатдач, мад къециз чукуруниз “эвер гуда”.
Аденомади, цварадин куркурдиз гуж гуз, мукьвал-мукьвал къециз финиз мажбурзава, простатади лагьайтIа, цварадин къаналдиз зарар гана, и кардиз манийвалзава (им простата воспаление хьайила жезва). Цвар къене амукьунни пис я, — къванер арадал къведа, дуркIун-рин ва гьакI вири бедендин давление хкаж жеда. Инсульт хьанвайбуруз и кар иллаки хаталу я.
Инал чна ихтилат гегьеншарин. 2021-йисан январдиз коронавирус са-гъар хъувунатIани, ам залай (Б.Ш.) кьезилдаказ алатнач. Гьа йисан июндин вацра давление 163-дав агакьна, заз инсульт хьана. Коронавирус галукьдалди пуд сеферда гьатта 250-дав агакьайлани заз са затIни хьайиди тушир.
Зун, Тагьирхуьруьн-Къазмайрин азарханадин кьилин духтур Гьасан Рагьимован (Аллагьди вичиз, хизанриз, азарлуйриз мягькем сагъвал гурай!) еке иштираквал аваз, тади гьалда Дербентдин больницадин реанимациядин отделенидиз агакьарна. Анани, зун къециз фин патал къарагъ тавурай, къекъуьн тавурай лагьана, руфунай тIеквен акъудна, катетер эцигна. Хъсанвал ийиз кIан хьайи чкадал, квез элкъвенатIа килиг садра! КапI ийизвай кас яз, дастамаз квахь тавурай лагьана, къециз экъечI тийиз, эхиз хьана. Нетижада цварадин куркурда къванер арадал атана, операция авуниз мажбур хьана.
Махачкъаладин урологиядин больницадиз фидалди, заз къванерикай, простатитдикай, аденомадикай лагьай кас хьанач. Жувахъ ихьтин азар авайди чир хьанайтIа, гьелбетда, за “къацу аптекадикай” менфят къачудай.
Катетердин месэлани регьятди тушиз хьана, малум хьайивал, ам гьар юкъуз михьна ва вацра 2-3 сеферда дегишарна кIанзавай затI я. ТахьайтIа, давление хкаж хьана, кьилин хамни кваз яру жеда. Азиятдикай, фикирдикай зун рахазвач. КIвализ эверай “Тади куьмекдихъ” талукь тир пешекарарни тахьайла, гьалар лап чIурубуруз элкъведа.
Са сеферда атай касди катетер ялна акъудиз алахъна. Абатхийир хьурай вичиз, гена мет атIумарнач! “Я бала, ваз акур, вуна авур кIвалахар яни ибур?” — хабар кьурла, “ваъ, я халу, ихьтин кIвалахар авайди ван кьванни хьайиди туш, амма ваз куьмек ийиз кIанзава эхир!” лагьана жаваб гана. “Сагърай, чан бала, чна са рехъ жагъурна кIанда акI хьайила”, — лагьана за. Чидач а касди низ зенг авуна хабар кьунатIа, ахпа лап регьятдаказ акъудна, цIийиди эцигна. Жувакай масад инжиклу хьана кIан тийидай кас яз, жувни, гьабурни кIеве тваз кIан жедач, мад сеферда эверизни кичIе жеда.
Ибур чна квез кичIерар гун патал кхьейди туш. Чаз кIанзавайди куьн, гьуьрметлубур, гьамиша куь сагъламвилин къайгъуда хьун я. Са куьнихъайни кичIе жемир. Чун квез куьмек ийиз гьамиша гьазур я.
Гьар сада жув хуьх. Квез Аллагь куьмек хьуй!
Эхирдайни меслят гуз кIанзава: чайникдиз куьлуь авунвай чичIекдин хъуьруьшар вегьена, абурун чай хъун простатит, аденома авайбуруз менфятлу я. И азаррин вилик пад кьаз куьмекдай, сагъардай ва къванер цIурурдай рецептар чна идалай кьулухъ мадни кхьида.
Башир Шихмурадов,
Теймур Гьабибов
