И йикъара милли сиясатдин ва динрин крарин рекьяй РД-дин министр Энрик Муслимов Дагъустанда авай чеченвийрин жемиятдин советдин исполкомдин дестедихъ галаз гуьруьшмиш хьана. Идакай «Лезги газетдиз» ведомстводин сайтди хабар гузва. Мярекатда министрдин сад лагьай заместитель Гьарун Давыдовани иштиракна.

Гуьруьшдин вахтунда жемиятдин советдин кар алай месэлайриз килигна ва абур гьялдай рекьер жагъурун веревирдна.

Энрик Муслимова РФ-дин «Репрессийрик акатнавай халкьар михьи яз гьисабунин (реабилитация — ред.) гьакъиндай» къанун тамамарунин гьалар галай-галайвал чирунин чарасузвал къейдна. КIватI хьанвайбуруз хабар гайивал, министерстводи Дагъустандин Казбековский ва Новолакский районриз фин ва къейднавай къанун кьилиз акъуддайла арадал къведай месэлайрихъ галаз чкайрал таниш хьун кьетIнава.

Чпин нубатда чеченвийрин жемиятдин советдин векилри республикадин жемиятдинни сиясатдин уьмуьрда активнидаказ иштиракун патал Дагъустанда авай чеченвияр гьазур тирдакай лагьана.

«Лезги газет»