29-мартдиз Дагъустандин Гьукуматди алай йисуз уьмуьрдиз кечирмишун патал «150 мектеб» проект тестикьарна. Алатай йисалай кардик акатай проектдин макьсад мектебрин материалринни техникадин гьалар цIийи авуниз куьмек гун я.
«Лезги газетдиз» Ахцегь райондин администрациядин пресс-къуллугъди хабар гайивал, проектда Ахцегьрин ООШ-ди, Калукрин ва КьакIарин СОШ-ри иштиракун патал райондин эцигунрин ва сад тир заказчикдин управленидин начальник М.Гьажиева маса къуллугъчийрихъ, мектебрин директоррихъ галаз мектебрин дараматрин къенепатан гьалар ахтармишна. Махсус комиссияди ахтармишунин нетижада «150» мектеб проектдин сергьятра аваз тухудай кIвалахар ва абурун кьадарар тайинарна.
Алай вахтунда райондин эцигунрин ва сад тир заказчикдин управленидин къуллугъчийри винидихъ тIварар кьунвай мектебрин дараматра тухудай кIвалахриз талукь чарар-цIарар туькIуьрзава.
«Лезги газет»
