30-июлдиз Дагъустандин мулкарал коронавирусдин цIийи инфекция гъунин ва ам чукIунин вилик пад кьунин рекьяй оперативный штабдин нубатдин заседание хьана. Региондин Кьил Владимир Васильеван регьбервилик кваз тухвай и мярекатдал тIугъвалдихъ галаз алакъалу яз эцигай сергьятвилер кьезиларунин мумкинвилериз килигна.
Заседанидал республикада эпидемиологиядин жигьетдай арадал атанвай гьалариз талукь яз малумат Роспотребнадзордин РД-да авай управленидин регьбер Николай Павлова гана.
Региондин кьилин санитарный духтурдин гафаралди, COVID -19 коронавирус акатнаватIа чирун патал дагъустанвийрин сагъламвилин гьал ахтармишун давам жезва. “За куьн хабардар авун лазим я хьи, чна и азардин вилик пад кьунин серенжемар кьабулун давамарзава. Инсанар гзаф кIватI жезвай чкайра маскаяр алаз къекъуьнин къайда къуватда ама. Дезинфекциядин къайдайрал амал авун давам жезва, агьалийрихъ галаз хабардар авунин кIвалах кьиле тухузва”, — малумарна Николай Павлова.
РД-дин Кьил Владимир Васильева къейд авурвал, региондин мулкарал вири карханаяр кIвалахдик кухтуникай лугьун гьеле фад ятIани, са бязи чкайри мукьвал вахтара чпин ракIарар ачухда. И барадай мисал яз РД-дин Кьили Дербентдин чешнедикай ихтилатна. Ина са жерге дерлекханаяр кIвалахдив эгечI хъувунва. “Шегьердин мэр Хизри Абакарова уьтквемвилелди ихьтин къарар кьабулна. Заз малум тирвал, кIвалахдик экечI хъувунвай чкайра коронавирусдин азар акатунин маканар пайда хьанвач. Санлай къачурла, республикада чна ачухнавай туьквенра, производствойра, базаррани азардин маканар пайда хьанвач. Амма им бушвалдай себеб туш, игьтиятвал хуьн ва жавабдарвал аннамишун герек я. Ша чун мад гьихьтин карханаяр кIвалахдик кухтаз жедатIа килигин.
Гьа са вахтунда а карханайрин хсусиятчийри аннамишун лазим я хьи, азардин макан пайда хьайитIа, а карханаяр агалда. Нетижада чIугур зегьметар вири гьакI бадгьавая фида”, — тагькимарнава Владимир Васильева.
Субъектдин руководителди и мукьвара РФ-дин Президентди видеоконференциядин алакъадин къайдада кьиле тухвай совещанидал веревирд авур месэлайрикайни ихтилат кудна. А совещанидал коронавирусдин вилик пад кьунин рапар ягъунин месэладизни еке фикир ганай.
Ахпа РД-дин здравоохраненидин министр Жамалудин Гьажиибрагьимов рахана. Ада алай вахтунда республикадин медицинадин идарайра стIалжем хьанвай ва COVID-19 коронавирусдин азар акатнавай 1026 кас авайди къейдна. Абурукай 597 кас Махачкъаладал гьалтзава. Сагъар хъийидай идарайра 2 агъзурдалай виниз чарпаяр кардик ква. Абурукай 1327 чарпай азад я. Санлай къачурла, COVID-19 коронавирус акатнавайди ашкара хьайи 8774 азарлу сагъ хъхьанва”, — къейдна министрди.
Совещанидал россиявияр, Азербайжандин сергьятдилай яна, ватандиз хтунин жигьетдай арадал атанвай гьалариз талукь месэладизни килигна. И месэладай малумат Дагъустандин вице-премьер Рамазан Жафарова гана. Ада къейд авурвал, къунши республикадихъ галаз авай сергьятдилай элячIна хквезвай чи ватандашар Роспотребнадзордин РД-да авай Управленидихъ галаз меслятнавай махсус обсерваторриз ракъурда.
Заседание кьиле фидай чIавуз са жерге муниципальный тешкилатрин кьилери тIугъвалдихъ галаз алакъалу яз эцигнавай сергьятвилер галай-галайвал алудуниз талукь теклифар гана. ИкI, Махачкъаладин кьил Салман Дадаева Роспотребнадзордин истемишунрал кIевелай амал авуналди, ресторанрин ва кафейрин, алишверишдин чIехи центрайрин, кинотеатррин ва фитнес залрин кIвалах кардик кухтадай ихтияр гун тIалабна.
Владимир Васильев раиж авур теклифдив гъавурда акьуналди эгечIна, амма ада и барадай акьалтIай къарар, гьалар Роспотребнадзордин РД-да авай Управлениди мукьуфдивди ахтармишайдалай кьулухъ кьабулдайдан гьакъиндай малумарна.
Заседанидал алай йисан сентябрдиз сесер гудай Сад тир юкъуз кьиле тухудай сечкийрин вахтунда сечкичийри вахтундилай вилик сесер гун тешкилуниз талукь месэладизни килигна. РД-дин Сечкидин комиссиядин председатель Мегьамед Дибирова малумарайвал, сесер гунин кIвалах жуьмя, киш ва гьяд йикъара — пуд юкъуз — кьиле тухуз жеда. Ада республикада кьиле фидай Сечкидин вири кампанийрин вахтунда сесер пуд юкъуз гунин къайдадикай менфят къачун теклифна ва кIватI хьанвайбурувай и теклифдин тереф хуьн тIалабна. Заседанидин иштиракчийри адан теклифдин тереф хвена.
«Лезги газет»
