Дагъустан Республикадин Кьилин ва Гьукуматдин Администрациядин пресс-къуллугъди хабар гайивал, 4-августдиз РД-дин Гьукуматдин Председатель Артем Здунова Дагъустандин халкьдин шаирар тир СтIал Сулейманазни Абуталиб Гъафуроваз эцигнавай гуьмбет ачухунин шад мярекатда иштиракна. Ам РД-дин МВД-дин дараматдин вилик квай аллеяда хкажнава.
Монументдин авторар Россиядин Федерациядин лайихлу художник, Дагъустандин скульптор Али Мегьамедов ва адан хва Мегьамед я. Абуру скульптурадал зур йисалай гзаф вахтунда зегьмет чIугуна.
Скульптура — монумент аллеяда къекъвезвай гьар садан фикир желбдайди хьанва. Халкьдин кьве шаир, чан алайбур хьиз, куьсридал ацукьнава, абур ширин суьгьбетрик ква. Мадни лагьайтIа, абур гьа аллеяда авай чпин дуст, халкьдин шаир Гьамзат ЦIадасадал (памятник) кьил чIугваз атанва.
Меркездин кьилин майдандал физвай и аллеяда ремонтдин кIвалахар кьиле тухудайла, Дагъустандин халкьдин кьве шаирдиз памятник эцигдай фикирни атана ва и кар лайихлувилелди кьилизни акъудна. Са рахунни алач, ихьтин художественный эсерри акьалтзавай несил ахлакьдин, марифатдин, ватанпересвилин, гражданвилин руьгьдаллаз тербияламишунин карда куьмек гуда.
Вичин рахунра А.Здунова ихьтин имарат ачухунин теклиф гайи МВД-дин кьилиз сагърай лагьана ва давамарна.
— Дагъустандин халкьдин шаирар неинки чи республикада, гьакI Россияда ва къецепатан уьлквейрани чизва. Суварар кьиле тухудайла, чахъ гзаф кьадар мугьманар, туристар илифзава. Са рахунни алач, абурни и аллеядиз къведа, Дагъларин уьлкведин чIехи тарихар, крар аквада. Дагъустан гьамиша къени, мугьманрал рикI алай макан я. Ам гьамиша зурба шаирралдини машгьур хьана. Чна ийизвай хъсан краралди гьар са касдиз Дагъустан ачухарзава.
Шад мярекатдал МВД-дин министр Абдурашид Мегьамедов, Махачкъала шегьердин администрациядин кьил Салман Дадаев, Дагъустандин писателрин Союздин председатель Мегьамед Агьмедов, халкьдин шаиррин веледар, хтулар, птулар рахана. КIватI хьанвайбуру памятникдал цуьквер эцигна.
«Лезги газет»
