Чи ватанэгьлияр – гьар сана

Лезги халкьдин векилри чпин хайи ерийривай яргъара жуьреба-жуьре хилера кIвалахзава, чпин ахлакьдалди, хуш къилихралди, хиве авай везифаяр намуслудаказ кьилиз акъудуналди гъурбатда агьалийрин, коллективрин­ патай гьуьрмет къазанмишзава. Абурукай сад Ленинграддин областда яшамиш жезвай, агропромышленный­ комплексдин хиле бегьерлувилелди зегьмет чIугвазвай, гзаф кьадар тIвара­риз­ни шабагьриз лайихлу хьанвай эминхуьруьнви Ярагьмедов Мегьамед Ярметович я.

Зи ва Ярагьмедоврин хизанар Эмин­хуьре Етим Эминан тIварунихъ га­лай куьчеда яшамиш хьана. Мегьамедни заз жаван вахтарилай хъсандиз чида.

Зи макъаладин игитдихъ ва лезгийрин рикI алай шаирдихъ галаз алакъалу са кьетIенвални ава: Мегьамед Ярметович Етим Эминан штул я.

Мегьамед 1963-йисуз лезги поэзиядин классик Етим Эминан ватан тир Ялцугърин хуьре дидедиз хьана. 1966-йисуз Кьиблепатан Дагъустанда чилер зурзунихъ галаз алакъалу яз, Ялцугърин жемят Аламишедиз (гила — Эминхуьр) куьч хьана.

Мегьамедан буба Ярмета ва диде Мазифата яргъал йисара Ялцугърин Етим Эминан тIварунихъ галай колхозда ва «Аламишинский» совхозда гьа­къи­­сагъвилелди зегьмет чIугуна, гьа са вахтунда 4 веледдизни тербия гана. Абурухъ чпин кIвал-югъ, хизанар ­хьанва. Мегьамед, чна винидихъ лагьайвал, Етим Эминан штул я. Етим Эминан руш Мислимат, Мислиматан руш Сагьибат, Сагьибатан руш Мазифат Мегьамед Ярметовичан диде я.

Рагьметлу Мазифат Ярагьмедовадиз вичин ата-бубадикай — Етим Эминакай — пай атанвай: адани шиирар кхьидай. Мегьамед Ярметовича Кириши шегьердин типографияда дидедин шииррин са ктабни чапдай акъудна.

И йикъара заз телефондай Мегьамед Ярагьмедовахъ галаз рахадай, адаз са шумуд суал гудай мумкинвал хьана. Малум хьайивал, ада 1983-йисуз Эминхуьруьн юкьван школа, гуьгъуьн­лай Ленинграддин областдин хуьруьн майишатдин институт акьалтIарна. М. Ярагьмедова Санкт-Петербург шегьердивай 150 километрдин мензилда авай Киришский райондин «Киришский» совхозда сифтедай агрономвиле, гуьгъуьнлай 15 йисалай виниз вахтунда совхоздин директорвиле кIвалахна. И девирда ада совхоз неинки районда, адалай яргъарани тIвар-ван авай, кIвенкIвечи ва къазанжияр гъизвай хуьруьн майишатдин карханадиз элкъуьрна. Ида директордин тIварни сейли авуна.

2018-йисалай М. Ярагьмедова Киришский райондин «Березовское» ЗАО-дин директорвиле кIвалахзава. Ада чаз лагьайвал, и кархана 1949-йисуз тешкилна. Ам асул гьисабдай нек гьасилунал машгъул я. «Березовское» ЗАО-диз 2011-йисуз жинсинин ири карч алай гьайванар арт­мишунин рекьяй, 2016-йисуз Племенной заводдин дережа гана.

Мегьамед Ярметович директорвиле тайинарайла, ЗАО-дихъ ири карч алай 1176 гьайван (абурукай 785 калер тир) авайтIа, алай вахтунда мал-къарадин кьадар 1800-далай алатнава. Гьар са каликай юкьван гьисабдалди 8702 килограмм, дуьгвейрикай (абур 247 ава) 8656 килограмм нек ацазва. Кьегьал лезги хцин чалишмишвал, къайгъударвал себеб яз, карханадин малдарри гьар вацра 50-60 агъзур манат пул мажиб къачузва, алава яз – премиярни.

— Чи карханади вахтунин истемишунриз жаваб гудай тегьерда кIвалах­зава, кIвенкIвечи къайдаяр кардик кутазва, — лугьузва Мегьамед Ярметови­ча. — Эхиримжи вахтара чна цIийи 3 трактор, хуьруьн майишатдин 6 техни­ка-агрегат, 4 машин маса къачуна. Калер тIебии тушир къайдада тумламишдай пункт бинедилай ремонт хъувуна, малдарвилин комплексдал къвезвай рекье къир цана, административный дарамат цIийи къайдада туьхкIуьрна, карханадин работникар патал хъсандиз дуьзмишнавай 4 кIвалер (квартираяр) маса къачуна.

М. Ярагьмедова алава хъувурвал, «Березовское» ЗАО Кириш районда Тигода вацIун къерехдал алай Кусино хуьруьн мулкунал кардик ква. Хуьре туьквенар, аялрин бахча, школа, медпункт, культурадин кIвал, библиотека, почта ава. Абурун чIехи пай ЗАО-дин къазанжияр себеб яз эцигнава.

Лезги хци регьбервал гузвай «Березовское» ЗАО-ди райондин АПК-дин хилен карханайрин арада галаз-галаз 1-чка кьаз 4 йис я. Эминхуьруьнви М. Ярагьмедоваз­ дурумлу ва гьакъисагъ зегьметдай 2024-йисан ноябрдин вацра «райондин гьуьрметлу агьали» лагьай тIвар гана.

Мегьамед Ярметович гьакIни «Россиядин агропромышленный комплексдин гьуьрметлу работник» тIварцIин, «Ватандин вилик лайихлувилерай» кьвед лагьай дережадин ордендин медалдин, Кириш райондин кьилин са шумуд грамотадин сагьиб я. Ам са шумуд йисуз Кириш райондин собранидин депутатвилени хкяна. Мегьамед Ярметовича Урусатда на­муслудаказ кIвалахзава, гьа идалди урус халкьдин арада гьуьрмет къазанмишнава.

Хъсан ва тежрибалу пешекар, регьбер, тешкилатчи хьиз, М. Ярагьмедов чешнелу хизандин кьилни я. Гъурбатда лезги халкьдин тIвар виниз хкажзавай Мегьамед Ярметовичахъ мягькем сагъламвал, хизанда хушбахтлувал ва кIвалахда мадни еке агалкьунар хьун чи мурад я.

Хазран  Кьасумов