2024-йисуз Дагъустанда хуьруьн майишатдин 45-дав агакьна мекераяр тешкилна. Санлай къачурла, анра тахминан 210 миллион манатдин метягь маса ганва. Им адалай виликан йисандалай 7 процентдин гзаф я. Идакай РД-дин Гьукуматдин Председатель Абдулмуслим Абдулмуслимова хабар гана. Адан гафаралди, мекераяр республикадин вири шегьерра ва районра тешкилзава.
«Мекерайра якIун, балугъчивилин, некIедин суьрсет, вечрен какаяр, таза емишар ва майваяр, ципицIар, гьакIни минеральный ятар, ички квачир хъвадай шейэр, вирт ва Дагъустандин чилел гьасилзавай маса суьрсет маса гузва. Алатай йисан мекерайрин арада виридалайни чIехибурукай сад Махачкъалада тешкилайди хьана — ада республикадин 35 райондай ва шегьердай тир 200-далай гзаф карханайри ва карчийри иштиракна», — къейдна ада.
Чи мухбир
