Чи ватанэгьлияр — гьар сана

Кьисметди инсан акъуд тийидай чка авач. Гьа кьисмет себеб яз, инсанрикай жуьреба-жуьре пешейрин сагьибарни жезва. Лезги халкьдин векилар къе Россия­дин гзаф субъектриз, гьакI къецепатан уьлквейризни акъатнава. Виликдай Советрин Союздин республикаяр яз хьайи Азербайжанда, Къазахстанда, Узбекис­танда, Къиргъизистанда, Туьркменистан­­да къенин девирдани лезги хизанар тIи­мил авач. Туьркияда тамам лезги хуьрер авайдини чаз чизва.

— Эминхуьряй тир Артур Пирмегьа­медова Францияда муаллим яз кIвалах­зава. Вучиз адакай газетда кхьизвач? — туьгьмет­дай тегьерда лагьана заз таниш са касди­. Заз Францияда чи хуьруьнвиди кIвалах­­зава лагьай ван виликдайни хьанай. (Къейд ийин, А. Пирмегьамедовакай К. Фер­залиева кхьей макъала «ЛГ-дин» 2021-йисан 5-нумрадиз акъатна).

Интернетдин куьмекдалди за адакай бязи делилар жагъурна. Артур Исра­филович Пирмегьамедов 1983-йисуз лезги поэзиядин классик Етим Эминан тIвар алай хуьре дидедиз хьана­. 2004-йисуз  ада  Дагъус­тандин  госу­­дарстводин педагогвилин уни­вер­ситет­дин­ къе­­цепатан чIаларин факультет акьал­­тIарна. Са шумуд йисуз А. Пирмегьамедова ДГПУ-дин ва ДГИНХ-дин къецепатан чIала­рин факультетра ингилис чIалан тарсар гана. Гуьгъуьнлай Артур Исрафиловича Францияда Клиссон шегьерда ингилис­ чIалан тарсар гудай ихтияр къачуна. 2015-йисуз Франциядиз фейидалай гуьгъуьниз ада анин образованидин минис­терствода «Признание эквивалентности иностранных дипломов о высшем образовании» рекьяй вичин чирвилер артухарна. А. Пирмегьамедова къецепатан уьл­кведа гьам государстводин образованидин идарайра, гьамни хсуси школайра кIвалахзава, анра ингилис чIалан тарсар гузва.

Малум хьайивал, ада ингилис чIа­лай тарсар школьникриз, студентриз, чIе­­хибуруз ва кьилдин ксариз гузва. Ада гьакIни умуми курс, фонетика (чIалан илимда сесер ахтармишдай пай), грамматика, гафар сивяй акъуддай, рахадай­, кхьидай къайдаяр чирзава, экзамен­риз­, тестериз, маса уьлквейриз финиз, инофирмайра жуьреба-жуьре хилера кIва­лахиз гьазурунин, ингилис чIалал ре­зюме (рахай ва кхьей гафарин эхирда лугьудай куьруь метлеб, нетижа) кхьинин ва маса крарани куьмекар гузва.       А. Пир­мегьамедов тежрибалу репетиторни я.

Артур Пирмегьамедовакай чаз делилар тIимил жагъана. ЯтIани, абуру къалурзава хьи, эминхуьруьнви дерин чирвилер авай пешекар я.

Эминхуьре яшамиш жезвай Артуран багърийри чаз лагьайвал, гьар кьвед-пуд йисалай ам хуьруьз хквезва. ЧIехи бубайрин ватан тир дагъдин Хутаргърин хуьруьз хъфин, ана михьи, гуьзел тIебиатдал сейр авун, къайи булахрин дад акун Артур Исрафиловичаз иллаки хуш я. Къуй адахъ мадни еке агалкьунар хьурай.

Хазран  Кьасумов