Са тIимил вахт идалай вилик Кьурагьа районэгьлийрикай виридалайни хъсан агалкьунар къазанмишнавай спортсменар ва абурун тренерар шад гьалара тебрикна. ИкI, алатай йисан нетижайралди, армиядин къайдада гъилералди кукIунай — Эрзиман Фетхуллаев, Нариман Эмирбегов, Имам Алибегов ва кьуршахар кьунай — Жафар Катибов, Ражаб Ражабов, Умар Шихрагьимов 2024-йисан виридалайни хъсан спортсменар яз къейднава. Йисан виридалайни хъсан тренерар яз — Къурбан Герейханов (армиядин къайдада гъилералди кукIунай), Ражидин Агьмедов, Амир Бабаев ва Амиль Шихрагьимов (пудни — кьуршахар кьунай). Спортсменризни тренерриз пишкешар гана.
Спортсменар ва тренерар руьгьламишунин мярекат тешкилнавайди Фахрудин Гьамидов тир — халис ватанперес, хайи халкьдихъ рикI кузвай, жегьилрихъ агалкьунар хьуник вичин лайихлу пай кутаз алахънавай кас. Ада жегьилриз вичелай алакьдай вири жуьредин куьмекар гузва, иллаки спортдал машгъулбур ам вичин кьетIен гуьзчивилик кутаз алахъзава. И кардай кIватI хьанвайбуру Фахрудин Гьамидоваз рикIин сидкьидай сагърай лагьана, адахъ чандин мягькем сагъвал ва вири крара агалкьунар хьун алхишна.
Регина Самедова
