21-февралдиз, Дуьньядин халкьарин хайи чIаларин йикъан сергьятра аваз, РД-дин Халкьдин Собранидин Председатель Заур Аскендерова республикада милли чIаларал акъатзавай газетрин кьилин редакторрихъ ва мухбиррихъ галаз гуьруьш кьиле тухвана.
Мярекатдин иштиракчийри Дагъларин уьлкведин хайи чIалар хуьнин ва вилик тухунин месэлаяр веревирдна, и рекье менфят къачуз жедай цIийи теклифар гана.
ГьакIни гуьруьшдал республикадин спикерди милли СМИ-рин са жерге векилрив Халкьдин Собранидин патай Разивилин чарар вахкана. Абурун арада «Лезги газетдин» редакциядин мухбир Али Арбенович Къардашовни ава.
Али Къардашов Дагъустандин халкьдин шаир Арбен Къардашан хва я. «Лезги газетдин» редакцияда кIвалахиз са акьван гзаф вахт туштIани, Алиди вичин хиве твазвай гьар са месэла жавабдарвилелди кьилиз акъудзава. Асул гьисабдай адан кIвалах газетдин сайт вилик тухунихъ галаз алакъалу я. Чна Алидиз агалкьун мубаракзава. Мадни еке агалкьунар хьурай!
«Лезги газет»
