Ихьтин лишандик кваз Сулейман-Стальский районда са жерге мярекатар кьиле фена – ачух тарсар, библиотекада гуьруьшар, элкъвей стол, илимдинни тежрибадин конференция, Эминан ватанда сейр, флешмоб, “Халкьдинбуруз элкъвенвай манияр” концерт ва масабур. Кьилин вакъиа лезги ва Дагъустандин эдебиятдин классик Етим Эминан шиирар кIелунай конкурс хьана.
И вири крарин нетижаяр алатай гьафтеда Кьасумхуьрел И.Тагьирован тIварунихъ галай Культурадин кIвале кьиле фейи шад мярекатдал кьуна.
Иниз школайра кIелзавай аяларни абурун муаллимар, райондин администрациядин кьил Нариман Абдулмуталибов, идарайрин регьберар, “Эминан кIелунрин” спонсор Шагьпаз Асаханов ва гзаф мугьманар атанвай.
Райадминистрациядин культурадин управленидин векилри гьазурнавай концерт анжах Е.Эминан эсерриз кхьенвай манияр лугьуналди, манидаррин устадвилелди тафаватлуди, итижлуди хьана. Д.Къазиева, О.Меликова, Я.Ярагьмедова, С.Саидовади, К.Камилова, ашукь Айдуна, С.Гьажиевади, А.Ризаева, Р.Абдулкебирова устадвилелди тамамарай манийри, конкурсда гъалиб хьайи аялри кIелай эсерри тамашачийрив Етим Эминан шииратдин алемдиз сейр ийиз, адан маналувал, шаирдин устадвал мад сеферда гьисс ийиз туна.
— Етим Эминаз Агьед Гьажимурадович Агъаева лезги шииратдин буба гьавайда лагьанвайди туш, — къейдна Нариман Абдулмуталибова. — Куьредин гъвечIи хуьряй тир ада девирдин хъсанни пис чирна, гьа вахтунин гьалар аннамишна, гуьзел, везинлу хатIаралди-шиирралди вичин фикирар халкьдал агакьарун — им чIехи устадвал, камалэгьливал я. Гьавиляй гьар са лезгидиз, чи балайриз Етим Эмин чир хьана кIанда. “Эминан кIелунрин” манани гьам я. Ихьтин мярекатри чпин бегьерни гудайдахъ чун инанмиш я. Чи халкь зурба авунвай, адан зигьин, кьатIунар, эдеблувал, къадимлувал гьар са патахъай къалуриз алакьай шаир Етим Эмин халкьдин яржарикай сад я. Гьавиляй адаз гьуьрмет авун, адан шииратдиз къимет гун ва абур чир хьун гьар са несилдин буржарикай я.
Нариман Абдулмуталибова, Етим Эминан шииррай хейлин мисалар гъиз, шаирдин бажарагъ кьатIуз жедайвал ачухарна.
Райондин кьили Махачкъалада карчивилел машгъул, Е.Эминан ватандаш, меценат Шагьпаз Асахановаз сагърай лагьана. Хайи хуьр, район, халкь патал ада вичин харжийрихъ ийизвай крар къейдна.
“Эминан кIелунар” конкурс са шумуд номинациядай кьиле фена.
“Устадвилелди Е.Эминан шиирар кIелун” номинациядай 1-чкадиз Эмиля Пирмегьамедова (Вини СтIалрин мектебдин 10-кл. Муаллим — Минаят Муталибова), 2- чкадиз Ирлан Межидов (Курхуьруьн мектебдин 9-кл. Муаллим — Анжелика Шихрагьимова), 3-чкадиз Сабрина Насрулаева (Герейханован хуьруьн 2-нумрадин мектебдин 11-кл. Муаллим — Альбина Къадирова) лайихлу хьана.
“Шаирдин эсеррай шикилар чIугун” номинациядай 1-чкадиз Абдулла Рамазанов (Кьасумхуьруьн 1-нумрадин мектебдин 7-кл. Муаллим — Мурад Мусаев), 2-чкадиз Эмина Селимханова (Эминхуьруьн мектебдин 8-кл. Муаллим — Жемиля Жигерова), 3-чкадиз Алиса Шихсаидова (Курхуьруьн мектебдин 8-кл. Муаллим — Амахан Жавадов) лайихлу хьана.
“Е.Эминан портрет” номинациядай 1-чка Абдул Сулейманова (райондин аялрин худшкола. Муаллим — Абдулвагьаб Рамазанов), 2-чка Салман Гьажиханова (райондин аялрин худшкола. Муаллим — Нариман Мазанов), 3-чка Заира Бабаевади (Кьулан СтIалрин мектебдин 8-кл. Муаллим — Къизханум Алимова) кьуна.
“Етим Эминаз бахшнавай хсуси шиир теснифун” номинация яшарин кьве дестедиз пайна кьиле фена. 1-чкадиз Эмирхан Айдаев (Эминхуьруьн мектебдин 7-кл. Муаллим — Жемиля Жигерова) ва Эмиля Пирмегьамедова (Вини СтIалрин мектебдин 10-кл. Муаллим — Минаят Муталибова), 2-чкадиз Алина Тагьирова (Шихидхуьруьн мектебдин 7-кл. Муаллим — Румина Муслимова) ва Альбина Гьажибалаева (Агъа СтIалрин-Къазмайрин мектебдин 9-кл. Муаллим — Соня Ибрамхалилова), 3-чкадиз Алина Абдурагьманова (Кьасумхуьруьн 1-нумрадин мектебдин 6-кл. Муаллим — Луиза Мирзоева) ва Марьям Гьасанова (Чуьхверхуьруьн мектебдин 9-кл. Муаллим — Альберт Эмирбегов) лайихлу хьана.
Вири гъалибчийриз ва абурун муаллимриз Шагьпаз Асаханова пулдин премияр ва грамотаяр гана.
Конкурсда ва мярекатда Е.Эминан шиир устаддиз кIелай Эмиля Пирмегьамедова ва хсуси шиир виридаз раижай Эмирхан Айдаев иллаки тафаватлу хьана.
Гъалибчийрихъ, хайи районэгьлийрихъ элкъвена, Шагьпаз Асахановани чIал, милли меденият, чи тарих ва эдебият, бубайрин эдеб-ахлакь, ацукьун-къарагъун хуьниз талукь меслятар гана ва идалай кьулухъни вичи хайи хуьр, район патал мергьяматлувилин крар акъвазар тийидайди къейдна.
— Етим Эминан шиирри чун руьгьдиз девлетлу ийизва, несилриз тербия гузва. Гьа яргъал девирра теснифнавай жавагьиррихъ къени еке метлеб ава, — алава хъувуна Ш.Асаханова.
Дагъви Шериф
