Дарвин Велибегов. Ам дуьньядин виридалайни хъсан художникрикай сад тир лагьайтIа, чун гъалатI жедач. Гьайиф хьи, къе чун адакай алатай вахтуна аваз рахуниз мажбур жезва: 2017-йисан 18-декабрдин нянихъ магьир устад Дарвин Велибегов гьамишалугъ яз чавай къакъатна.
Гьажибеган хва Дарвин Велибегов Ахцегь райондин Чеперин хуьре дидедиз хьана. Ам жуьреба-жуьре шегьерра – Новочеркасскда, Грозныйда, Ленинградда, Махачкъалада яшамиш хьана. Рангарал чан гъидай алакьунар авай инсанди эхиримжи йисара Бакуда уьмуьрзавай.
Лагьана кIанда, Дарвин Велибегов кьетIен хатI авай художник яз дуьньядин хейлин уьлквейра машгьур хьанвай. Адан гзаф кIвалахри къенин юкъузни Азербайжандин, Урусатдин, Украинадин, США-дин, Туьркиядин, Германиядин, Франциядин, Австриядин, Израилдин, Норвегиядин, Япониядин, Италиядин, Англиядин, Польшадин, Югославиядин хсуси коолекцияр ва государстводин музеяр гуьрчегарзава.
Дарвин Велибегова 1965-йисуз Грозныйдин госуниверситетдин физкультурадин факультет, гуьгьуьнлай Ленинградда В.Мухинадин тIварунихъ галай высший художественно-промышленный училище (алай вахтунда — академия) акьалтIарна. 1976-йисуз ам СССР-дин ва Дагъустандин, 1980-йисуз Азербайжандин художникрин Союзрин членвиле кьабулна.
Художникдин шикилрин алемдиз гьиссерин деринвал, фикиррин азадвал, философиядин метлеб, дуьнья кьатIуниз эвер гун хас я. Ада прикладной ва монументальный живописда кьетIен гел тунва. Велибегован аламатдин кистиникай са агъзурдалай гзаф шикилар хкатнава. Ада «Лацу дурнаяр» тIвар алай монументальный гуьмбетди 1984-йисуз Дагъустандин Гьукуматди тешкилай конкурсда 1-чка кьунай. 1989-йисуз виридуьньядин ктабрин выставкада 1-чкадиз лайихлу хьайи «Азербайжандин Яру Ктабда» Дарвин Велибегован 150 шикил гьатнава.
Дарвин Велибегов алакьунар авай художник хьиз, хъсандиз хайи чIалан гъавурда авай пешекарни тир. Ада и рекье тайин кIвалахарни кьиле тухузвай, илимдин макъалаярни кхьена чапдай акъудна. Абур санал кIватIайтIа, са шумуд ктаб арадал къведа. Художникди-чIалан пешекарди Кавказдин расадин халкьарин чIаларин таблица туькIуьрна, анна 1700 миллетдин тIвар кьунва. Дарвин Велибегов лезги чIал дуьньядин винел алай виридалайни къадим чIаларикай сад яз гьисабзавай.
Чилин винел эбеди са затIни алач. Инсандин уьмуьр са легьзе ятIани, камал, бажарагъ, эдеб авай касдилай а легьзе асиррай асирриз фидай, несилрин рикIерални мецерал жедай аламатдин ирсиниз элкъуьриз жеда. Дарвин Велибеговалай и кар алакьна. Ада чаз, лезги халкьдиз, чIехи ирс – девлет тунва. Вичин уьмуьрдин мана, макьсад, гьакъикъат тунва. Чна надир художникдин тIвар, адан ирс багьа ядигар хьиз хуьда.
«Лезги газетдин» редакциядин коллективди Дарвин Велибегован хизанриз, багърийриз, ярар-дустариз, дериндай хажалат чIугуналди, башсагълугъвал гузва. Чнани квехъ галаз куь гъам-хажалат пайзава.
«Лезги газет»
