И мукьвара Дербентда Дагъус­тан­дин писателрин Союздини Женги­нин баркаллувилин музейди «Вири кье­гьалвилерин кьадар-гьисаб авач» тIвар алаз тешкилнавай чIехи мярекат  кьиле фена.

Ина, Дербентдин музейда, женгерин гьерекатра иштиракай, Чернобылдин АЭС-дал кьиле фейи мусибатдин хатасузвал хуьник пай кутур, Россиядин химиядинни биологиядин кьушунрин ветеран, Дагъустандин писателрин Союздин член, вичин ери-бине Ахцегь райондин Фиярин хуьряй тир гвардиядин полковник Нисрет Исмаилован уьмуьрдинни женгинин рекьиз талукьарнавай пIипI ачухна. Важиблу и вакъиада иштиракун патал чкадин агьалиярни са кьадар мугьманар кIватI хьанвай. Абурун арада Фиярин хуьруьн къаюмвилин советдин  кьил Идаят Насиров, Да­гъустандин писателрин Союздин секретарь Максим Алимов, «Честь и слава» ордендин сагьиб, ЛНР-да физвай дяведин махсус серенжемда иштиракзавай (исятда женгина хер хьунихъ галаз алакъалу яз отпускда авай), гаубицайрин артиллериядин старшина,  Нисрет Исмаилован гъвечlи стха Шарафудин Исмаилов, «Дагъустандин намус ва дамах», «Къизилдин лекь» орденрин ва «Почетный железнодорожник» лишандин сагьиб Чайдабег Расулов авай.

Мярекат музейдин директор Алик Кьасумова залда кIватI хьанвай Валентин Эмирован тlварунихъ галай школа-интернатдин кадетрин ва экономикадинни праводин колледжда кlелзавай аялрин вилик куьруь гаф лугьуналди ачухна.

Мярекатда винидихъ тIварар кьунвайбурулай алава яз музейдин къуллугъчи Гуьлпери Шабановна,  Нисретан хайи вах, Ахцегь райондин биб­лиотекадин къуллугъчи, Дагъустандин культурадин лайихлу къуллугъчи  Майя Исмаилова,  РФ-дин просвещенидин гьуьрметлу къуллугъчи, РД-дин просвещенидин лайихлу къуллугъчи, Дербентдин общественный палатадин председателдин заместитель  Агъаширин Давудов, «Садлагьайбур»­ тIвар алай гьерекатдин куратор Севиль Хандадашева, азербайжанви ша­ир-таржумачи Тагьмираз Имамов, и цIарарин автор ва масабур авай.

Дагъустан Республикадин лайихлу артистка Мияса Мурадхановади Нисрет Сейфуллагьовичаз кхьенвай вичин шиир кlелна. Нисретан хуьруьнви, лезгийрин машгьур ашукь Шемшира ширин сесиналди кIватI хьанвайбурун гуьгьуьлар мадни виниз хкажна.

Мярекатдин эхирдай Нисрет Ис­маи­лова и мярекатдал атанвай кадет­ри аскервилин къуллугъдикай гайи ви­ри суалриз жавабар гана. Виридахъ чандин сагъвал хьун, рикlин экуь мурадар кьилиз акъатун, дуьнья ислягь хьун ва чи уьлкведи цlийи девирдин фашистрихъ галаз тухузвай дяведин махсус серенжем чи гъалибвилелди куьтягь хьун алхишна.

Мугьманар таниш хьун патал Н.Ис­маилован ктабарни («Куьгьне дус­тар», «Фий: есть в горах такое село», «Илиф, дустар», «Офицердин кхьинар», «В моё время») столрал эцигнавай.

Гьажиагъа

Мегьамедшерифов

СКЖД-дин гьуьрметлу къуллугъчи,

ракьун рекьерин музейдин директор, тарихчи-журналист