И йикъара СтIал Сулейманан райондин ЦIийихуьруьн спортдин майдандал Жуьрэтлувилин ордендин сагьиб, СВО-да телеф хьайи Тагьир Маметован экуь къаматдиз бахшна мини-футболдай районрин командайрин арада сад лагьай турнир кьиле тухвана. Ам тешкилнавайди райадминистрациядин спортдин, туризмдин ва жегьилрин крарин рекьяй комитет тир.
Турнирда Кьиблепатан Дагъустандин итимрин 6 командади иштиракна. Къизгъиндаказ кьиле фейи къугъунрин нетижада «Парк» (СтIал Сулейманан район) 1-чкадиз лайихлу хьана. «Герейханово» (СтIал Сулейманан район) ва Кьурагь райондин командайри 2 ва 3-чкаяр кьуна.
Командайрив ва тафаватлу хьайи футболистрив шабагьар вахкуниз талукьарнавай мярекатда райондин кьил Саид Темирханова, спортдин, туризмдин ва жегьилрин крарин рекьяй комитетдин директор Чингиз Абдулмежидова, СтIал Сулейманан ва Кьурагь районра военный комиссар Райзудин Женетова, СВО-дин игитдин ими Руфет Маметовани иштиракна.
С.Темирханова спортдин серенжемдин важиблувал къейдна, ам гьар йисуз кьиле тухунин умудлувал къалурна, спортсменриз агалкьунар тебрикна. Халис ватанперес тербияламишунай ада Тагьир Маметован диде-бубадиз рикIин сидкьидай сагърай лагьана. Районэгьлиди женгина къалурай кьегьалвал виридаз чешне тирди, Россиядин хатасузвал таъминарун патал вичин чандилайни гъил къачуна, ада кутунвай пай чIехиди тирди къейдна.
Рагнеда Рамалданова
