Мукьвал вахтара Ахцегь районда спортдин цIийи мад са объект ишлемишиз вахкуда. Идакай чаз райадминистрациядин пресс-къуллугъди хабар гана. ИкI, алай вахтунда Ахцегьа, Абдулжелил Идрисован куьчеда, «Хуьрерин мулкар комплекснидаказ вилик тухун» милли проектдин сергьятра аваз районда футболдин 8 лагьайди тир майдан туькIуьрун патал кIвалахар кьилиз акъудзава.
ЦIийи комплекс районда футбол ва санлай спорт вилик тухун патал къачунвай нубатдин кам я. Винидихъ тIвар кьунвай проектдин сергьятра аваз футболдин виликдай эцигнавай майданри лагьайтIа, сир туш, спорт вилик тухунин ва чкадин командайриз куьмек гунин карда важиблу роль къугъвана.
Спорт вилик тухунин месэлаяр райондин кьил Абдул-Керим Палчаеван гьар йикъан гуьзчивилик ква. Муниципалитетдин кьиле авай ксарин активвилин ва чалишмишвилерин нетижада спортдин хилен проектарни уьмуьрдиз кечирмишиз алакьзава.
Рагнеда Рамалданова
