Алай йисан 23-майдиз РД-дин Гьукуматдин Председатель Абдулмуслим Абдулмуслимован регьбервилик кваз Дагъустандин экономика дурумлувилелди вилик фин таъминарунин рекьяй оперативный штабдин заседание кьиле фена. Идан гьакъиндай “Лезги газетдин” редакциядиз РД-дин Гьукуматдин пресс-къуллугъди хабар гана.
Заседанидин сергьятра аваз Абдулмуслим Абдулмуслимова республикада бизнесдиз талукь яз ахтармишунрин кьадар тIимиларнавайдакай малумарна.
“Дагъустан Республикадин прокуратуради алай йисуз кьиле тухудай ахтармишунрин умуми план туькIуьрдайла, тайинарнавай 2100 ахтармишун пландикай хкудна, 1500 ахтармишун федеральный дережада аваз кьабулнавай къарарар бинедиз къачуна, тIимиларна”, — малумарна премьер-министрди. Ада гьакIни муниципалитетрин кьилериз чкайрал бизнесдал машгъул ксариз куьмек гуниз эвер гана.
Абдулмуслим Абдулмуслимова гьукумдин органрин руководителриз ва шегьеррин, районрин кьилериз бизнесдихъ галаз ачух алакъаяр туькIуьруниз эвер гана.
“Алай вахтунда кар алай месэлайрикай сад гьукумдин органри ва бизнес — сообществойри чпин арада авай санал кIвалахунин алакъаяр мягькемарун ва гегьеншарун я. Ида жуьреба-жуьре къурулушра кьил кутазвай крариз, теклифриз гъиле-гъил аваз килигдай ва чкайрал экономикадинни яшайишдин месэлаяр уьмуьрдиз кечирмишдай шартIар тешкилда.
Инфраструктурадин имаратар эцигунин, объектар ремонт авунин кар алай кIвалахар тайинарнавайвал давамарна кIанда. Фикирдиз къачунвай вири кIвалахар уьмуьрдиз кечирмишун чи буржи я. Ида чаз зегьметдин базар дурумлу ийидай, зегьметчийрин мажибар хкаждай мумкинвал гуда. Социальный жигьетдай вири хиве кьунар тамамарун чи эвелимжи буржи я”, — лагьана премьер-министрди.
Республикада экономикадин жигьетдай авай гьаларикай РД-дин Гьукуматдин Председателдин сад лагьай заместитель Руслан Алиева суьгьбетна. Ада федеральный дережада аваз карханайриз алава куьмек гузвайдакай хабар гана. ИкI, импортдин кар алай продукция къачудайла, ийизвай харжар тIимиларунин мураддалди кьезил кредитар къачудай махсус программа кардик кутунва.
Алиева мадни лагьайвал, Россиядин Федерациядин Президентдин теклифдалди административный чIурунрин (нарушения) гьакъиндай Кодексдик дегишвилер кухтадайвал я. Ана са бязи истемишунар кьилиз акъуд тавунай бизнесдал машгъулбур жавабдарвилиз чIугунин къайдаяр кьезиларзава. Мисал яз, ахтармишдайла, чIурунар жагъай сад лагьай сеферда жерме ийизвач.
“Алай вахтунда Россиядин экономикади, гьа гьисабдай яз карханайрини, алай девирдин шартIариз килигна, чпин кIвалах цIийикIа туькIуьрзава. Продукция маса къачузвай ксар, базарар дегишарзава. И карда бизнесдиз куьмек гун важиблу я. Чи вилик акъвазнавай везифа, кIвалахдин еришар агъузар тавуна, ийизвай гьар са кар еридивди кьилиз акъудун, талукь документар къалурнавай вахтара туькIуьрун, чап авун я”, — лагьана Р.Алиева.
Карчивилел машгъул жезвайбуруз кьезил кредитар гунин къайдайрикай “Сбербанк России” ПАО-дин Дагъустандин отделенидин руководитель Евгений Морозова лагьана. Алай йисан мартдилай майдин вацралди МСП-дин субъектриз куьмек гунин мураддалди “Господдержка 15%” программадин бинедаллаз 758 миллион манатдин къимет авай 54 кредит ганва. Идакай гъвечIи бизнесдал машгъул жезвайбуруз — 50 кредит (322 миллион манат).
Вичин рахунра РД-дин промышленностдин ва алишверишдин министр Низам Халилова гьукуматдин патай куьмек агакьнавай карханаяр гьибур ятIа лагьана.
2022-йисан 20-майдин делилралди, региондин Фондунин кьезил займаяр (110 миллион манат) 4 карханадив агакьна. ИкI, “Каспий Гласс” ООО-диз “Дагъустан Республика вилик тухунин проектар” программадин сергьятра аваз “Шуьшедин шарикар акъуддай организация” проект уьмуьрдиз кечирмишун патал 50 миллион манат чара авуна. “Оборотный капитал” программадин сергьятра аваз “Роял” ООО-див 20 миллион манатдин займ агакьна. И программадин бинедаллаз “Пионер” ООО-ди 20 миллион манат къачуна. “Резидент” программадин бинедаллаз “Дагполимер” ООО-ди 20 миллион манат къачуна.
РД-дин карчивилин ва инвестицийрин рекьяй агентстводин руководитель Гьажи-Мурад Абашилова суьгьбет авурвал, 2022-йисан сифте кьилерилай гъвечIи ва юкьван карчивилел машгъул жезвайбуруз хейлин куьмекар гузва.
ИкI, “Даглизингфонд” микрофинансовый компанияди 63,8 миллион манатдин къимет авай лизингдин 7 ва 55,3 миллион манатдин къимет авай микрозаймдин 16 икьрар кутIуннава. Коммерциядинди тушир “Фонд содействия кредитования субъектов малого и среднего предпринимательства РД” организацияди МСП-дин 27 субъектдиз 116,6 миллион манатдин къимет авай тапшуругъар ганва.
«Лезги газет»
