Саудовский Аравияди 2022-йисуз гьаждал физвайбуруз ийизвай къуллугърин къимет тайинарнава. Дагъустандин “Марва-Тур” оператордини чпин къиметрин гьакъиндай малумарнава.
Санлай къачурла, гьаждал фин 4,7 агъзур доллардай акъваззава. Динэгьлияр Махачкъаладай Дубайдиз самолетра аваз фида, анай абур Мединадиз автобусра аваз агакьарда.
Алава къуллугърикайни менфят къачуз жеда. Дубайдай Мединадиз самолетда аваз фин 700 доллардай акъвазда. Мединада 3 йикъалай 8 йикъалди акъвазиз кIанзавайбуру алава яз 400 доллар харж хъийида.
Алай йисуз, Россиядин Федерациядин маса субъектрив гекъигайла, Дагъустандай Исламдин пак чкайриз виридалайни гзаф инсанар — 4,5 агъзур кас фида.
Гьаждал физвай дагъустанвийрикай агъзур касдиз пул сенатор Сулейман Керимова ганва. Алай вацран юкьвара Дагъустандин мискIинра гьаждал фидай мумкинвал авачир дагъустанвийрин арада путевкаяр пайна.
«Лезги газет»
