РД-дин здравоохраненидин министерстводин сайтда хабар ганвайвал, 2013-йисуз Дагъустанда республикадин хизандин сагъламвал хуьнин ва репродукциядин центрадин (РЦОЗСиР) пешекаррин еке кIвалахдин нетижада ЭКО-дин куьмекдалди сад лагьай аял дуьньядиз атана.
— И вакъиа аламатдин кар тирди гьикI лугьудач! — гзаф йисар алатайлани, рикIик шадвал кваз къейдзава Бабаюрт райондай тир агьали Рупия Алхановади, вичин руш хайи вахт рикIел хкидайла. Адан рушан и йикъара 5 йис тамам хьанва. Амина Дагъустанда ЭКО-дин (экстракорпоральное оплодотворение) куьмекдалди дуьньядиз атанвай сад лагьай аял я. Саки 7 йисалай виниз вахтунда Рупиядиз аял хун патал сагъламвал мягькемардай дарманрикай чара хьаначир. Пешекарри адаз ЭКО авун меслятнай.
— Республикадин хизандин сагъламвал хуьнин ва репродукциядин центрадин къуллугъчийри ЭКО-дин куьмекдалди аял хун теклифнавай чарчиз за кьве йисуз фикир ганачир, — рикIел хкизва Рупияди. — За гзаф фикирзавай, хъсан ва пис терефар алцумзавай. Эхирни, зун рази хьана. Авай вири мумкинвилерикай менфят къачун лазим тир фикирдал атана. Амукьзавайди уьмуьрдин юлдаш и фикирдал гъун тир, гьикI хьи, а чIавуз адаз и мумкинвиликай менфят къачун хъсан аквазвачир.
РЦОЗСиР-дин пешекаррихъ галаз меслят хьайидалай кьулухъ Алхановрин хизанди ЭКО-дикай менфят къучунин разивал гана, амма са шартIуналди-анжах са сеферда нетижа тагайтIа, мад и кар давамардач. А чIавуз абуру гьа сад лагьай сеферда хъсан нетижа жеда лагьана са артух еке умудар кутунвачир. Дишегьли кIвачел залан хьана. Гьа икI яргъал йисара хизандин вил алай велед дуьньядиз атана.
— КIвачел залан тир вахт лап агъурдаказ акъатзавай. Суткада 24 сятда зун Республикадин хизандин сагъламвал хуьнин ва репродукциядин центрадин пешекаррин гуьзчивилик квай. Зенгерзавай ва зи гьалдикай абуру хабар кьазвай. Абуру зак къалабулух кутазвай вири суалрай, крарай заз меслятар гузвай. Зи гьалдикай за абуруз, куьлуь-шуьлуьярни кваз, лугьузвай, — рикIел хкизва Рупия Алхановади.
Алхановрин хизанди рушаз Мугьаммад пайгъамбардин (с.а.с.) дидедин гьуьрметдай Амина тIвар гана. Амма хизан патал аламатдин кIвалахар идалди акьалтIначир. Аялдин 7 варз тамам хьайила, Рупия (ЭКО галачиз) кьвед лагьай сеферда кIвачел залан хьана. Рушал Аиша тIвар эцигна. Мад кьуд йисалай хизанда Айнур — пуд лагьай руш — дуьньядиз атана.
— Чна ихьтин девлетдикай гьич фикирни авуначир, — суьгьбетзава Рупияди ва адан уьмуьрдин юлдашди.
Гила хизанди мад са аял хуникай фикирзава. Абуру и сеферда гада хьуник умуд кутазва.
— ЭКО — ди аялар тежезвай хизанриз еке умудлувал гузва. Амма вири хъсан жедайдак, сагълам аял гъилиз къведайдак умуд кваз, и кардик хев кутуна кIанда, — лугьузва гзаф аялрин дидеди. — И месэлади диде-бубайрин сабурлувал ахтармишзава. Гьавиляй и къилихдиз еке фикир гун, сабурлувал хуьн гзаф важиблу я. Гьелбетда, духтуррин чирвилерилайни гзаф крар аслу жезва. Гьаниз килигна абурун меслятрал амална кIанда. Гьа чIавуз аламатдин крарини чеб яргъалди гуьзлемишиз тадач”, — къейдна дишегьлиди.
Къуй алукьзавай ЦIийи йисуз чи кIвалера берекатар бул, аялрин хъвердин ванерни артух хьурай!
Регина Семедова
