Чи халкьдин чпихъ зурба кьил авай векилрикай чав дуьньядин вири пипlерай суракьар агакьзава. Россиядин жуьреба-жуьре шегьерра ва къецепатан уьлквейра баркаллувилелди зегьмет чlугвазвай, илимдин рекье уьлкведин ва дуьньядин дережадани нуфузлувал къазанмишнавай лезгийрикай чна газет кlелзавайбур хабардарзава.
1957-йисуз Дагъустанда дидедиз хьайи Тажиб Агьмедханович Мирзабеговни гъурбатда илимдин кукlушрихъ агакьнавай лезгийрикай сад я. Медицинадин илимрин доктор Т.Мирзабегова алай вахтунда США-дин Массачусетс штатдин Бостон шегьерда кlвалахзава. Ам ана биотехнологический Biomirex, Inc ва Россиядин Пущино шегьерда “Антерикс” ООО-дин тешкилатрин сагьиб — президент ва директор я.
Т.Мирзабегова 1990-йисуз Ломоносован тlварунихъ галай МГУ куьтягьна. Гуьгъуьнлай биохимиядин хиляй технический илимрин кандидатвилин дережани къачуна. Ам МСМ Protein Technologies Inc компаниядин кьилин алим, ахтармишунар тухунин рекьяй Multispan Inc компаниядин вице-президент, МСМ Protein Technologies Inc тешкилатдин член ва хейлин маса кар алай идарайрин илимдин къуллугъчи я.
2005-йисалай инихъ лезги алимди Бостонда авай вичин биотехнологический компанийра Россиядин 32 алимдиз кlвалахдин рекьяй гьазур жез куьмекна. Алай вахтунда Biomirex ва Antherix компанийрин алимри рак, ВИЧ ва офтальмологиядин азаррикай сагъардай цlийи дарманар арадал гъунин карда сих алакъаяр аваз кlвалахзава.
Зурба ватанэгьлидихъ философиядин илимрин докторвилин дережани ава. Гарвардский институтдин медицинадин школада муаллим яз кlвалахдалди вилик ада Италиядин, Калифорниядин университетрани зегьмет чIугуна. Т. Мирзабегова фармацевтикадин машгьур тешкилатрихъ галаз алакъаяр хуьзва. Гарвардда ада тlвар-ван авай алимрихъ галаз санал медицинадин хиле цlийи жуьредин технологияр арадал гъана.
Машгьур алимдин хизанда кьве гададизни са рушаз тербия гузва.
Гьазурайди — Куругъли Ферзалиев
