Са инсан Гьасан аль-Басридин (Аллагьдин регьимдик хьурай вич) патав атана ва лагьана:
— Флан кас куь далудихъ писдаказ рахана.
— Мус? — хабар кьуна Гьасан аль-Басриди.
— Флан юкъуз.
— Ваз ам гьина акуна?
— Вичин кIвале.
— Ада кIвале вуч ийизвай?
— Мугьманар къунагъламишзавай.
— Ада мугьманриз гьихьтин хуьрекар гьазурнавай?
— Гьар жуьредин, абурун кьадар муьжуьдав агакьзавай.
— Эй, вун, ви хуквадивай муьжуьд жуьредин хуьрекар эхиз хьана! Закай лагьанвай анжах са гаф эхиз хьаначни? Алад инлай, фасикь (гунагькар), — лагьана алимди.
Насигьат
Фитнеяр чукIурзавайбурухъ галаз жув нифретлудаказ тухвана кIанда. Абурал ихтибарна виже къведач. Идан гьакъиндай пак Къуръанда Аллагь-Таалади лагьанва: «Я инанмиш хьанвайбур! Эгер куь патав хабар гваз фасикь атайтIа, тахсир квачир инсанриз зарар тежедайвал, куьне адан гьакъикъат чира, тахьайтIа, авур амалдин жигьетдай куьне гьайифар чIугвада” (“аль-Гьужурат” сура, 6-аят).
Фитнедин гафар масадав агакьар хъувун чIехи жазаяр гузвай амалрикай, фитне ийизвайбурухъ яб гьатта акалунни инанмиш хьанвайбуруз къадагъа я.
Имам аль-Гъазалиди лугьузвайвал, гьар нин патав фитне гвайди атайтIани, ам ругуд шартI кьилиз акъудуниз мажбур я:
— фитнедин тереф хвена кIандач;
— фитнечидин вилик пад кьуна кIанда;
— Аллагь патал адакай хъел атана виже къведач;
— ада фитне ийизвай касдикай чIурукIа фикирна кIандач;
— авунвай фитнедин гьакъикъат чирун патал деринра гьахьун герек туш;
— ван хьайи фитне масабуруз ахъайна кIандач.
Са сеферда Вагьб ибн Мунаббигьаз сада лагьаналда: “Ваз сада лап пис экъуьгъунар авуна”.
Вагьба лагьана: “Яраб а хабар зав агакьарун патал иблисдиз валай гъейри масад жагъанач жал?”.
“Ас-салам” газетдай
