И йикъара кIелдайбурув алатай йисан “Самур” журналдин эхиримжи 6-нумра агакьна. Ам “СССР-дин 100 йис” рубрикадик кваз чапнавай Дагъустандин халкьдин писатель Абдуселим Исмаилован “Къейд тийидай сувар” макъаладилай гатIунзава.
Халкьдин писателдин 75 йисни тамам хьанва. И вакъиадиз талукь яз педагогикадин илимрин кандидат Исламудин Гьуьсейнован “Гьамиша ва виридахъ кузвай рикI” гегьенш макъала ганва. Авторди юбилярдин уьмуьрдин, яшайишдин, яратмишунрин ва жемиятдин къатар къарагъарзава, ада Дагъларин уьлкведин ва лезги халкьдин медениятдик, эдебиятдик кутазвай пай, къазанмишнавай агалкьунар къалурзава.
“Жувни тестикь авун патал уьмуьрдиз…” лишандик кваз А.Исмаилован эхиримжи дафтаррай къачунвай хейлин шиирарни ганва. Абурун темаяр ватанпересвилихъ, алай девирдин вакъиайрихъ, инсанвилин ерийрихъ, кIанивилин гьиссерихъ, милли тIебиатдихъ галаз алакъалубур я.
“Гьикаят” паюна публицист, писатель Нариман Ибрагьимован “Тапаррин къармахра” романдиз гегьенш чка ганва. “Лацу шегьерда”, “Алдатмишун”, “Къариблухда”, “Дидедин дерт”, “Халифатдин къурбандар” кьилерикай ибарат паяра эсердин игитар акъатзавай вилаятрикай, абурун кьилел къвезвай дуьшуьшрикай, инсанвилин ерияр квахьнавай, хайи кIвал, диде-буба, Ватан рикIелай алуднавай, чи уьмуьрдихъ галаз ерли кьан тийизвай идеологиядин къурбандар хьанвай ва, абурун хурукай хкечIна, экуьвилихъ ялзавай инсанрин кьисметрикай ихтилатзава.
Шаир Агьмедов Арифан (Лезги Ариф) 60 йисан юбилейдиз талукь яз “Минет я ваз, завай сабур кьакъудмир” рубрикадик кваз шиирар ганва.
Фейруз Беделахтулан “Са миллион доллар жагъай лезгидикай кьиса” гьикая, Мансур Куьревидин Етим Эминан жагъун хъувунвай “Шукур хьуй ваз, я Сад Аллагь” шиирдиз ганвай баянар, къейдер кIелиз хуш къведайбур я.
Абад Азадов
