Литературадинни художественный ва жемиятдинни сиясатдин “Самур” журналдин алай йисан эхиримжи 6-нумра чапдай акъатнава. Гьасятда лугьун хьи, ина итиждивди кIелдай пара хъсан эсерар ава. Абурун авторарни жуьреба-жуьре несилрин, жанрайрин векилар я.
“КьетIен везифайрин генерал” макъалада литературадин журналдин кьилин редактор Мурад Агьмедова РД-дин Кьил Владимир Васильева кьве йисуз республикада тухвай кIвалахдин нетижаяр кьазва, адан регьбервилин кIвалахдин кьетIенвилер, гьукуматдин членрихъ, муниципалитетрин руководителрихъ, карханайрин, фирмайрин, компанийрин векилрихъ, общественностдихъ галаз алакъаяр мягькемарзавай къайдайрикай, абурувай чпин везифайрив намуслувилелди эгечIун истемишзавай тегьердикай ихтилатзава.
Нумрада гьикаятдин эсерри гзаф чка кьунва. Дагъустандин халкьдин писатель Абдуселим Исмаилова “ЦIун хура” кьил ганвай рекьин къейдера — рикIин гьиссера — куьруь новеллайра чан алай къенин уьмуьр, хайи макандин ажайиб, гуьзел, гьейранвалдай тIебиат, жуьреба-жуьре реформайрин, цIийивилерин, дегишвилерин таъсирдик акатнавай инсанрин алакъаяр къалурзава.
Нариман Ибрагьимован “Зегьерлу кьисас” повестдин гьерекатар эхирдиз атанва. Ажайиб ва сирлу гьалара пуд итим кьейи тахсиркарвилин бинеяр ахтармишзавай силисчи гзаф хъутIалрай экъечIзава, шак физвай гзаф инсанар гуьзетдик кутазва, гьа гила — мад тахсиркар дуьздал акъатда лугьуз, умудлу жезва. Эхир ам гьакъикъи тахсиркардин геле гьатзава, амма силисчиди кьабулай къарар садани гуьзет тавурди жезва.
Жегьилзамаз рагьметдиз фенатIани, Заидин Гьасанова лезги гьикаятдик вичин пай кутуна. Абдуселим Исмаилова 70-йисан юбилей фикирдаваз вичин тай-туьш, яр-дуст, яратмишунин амадаг, къени, хъсан инсан, бажарагълу гьикаятчи хьиз хъуьтуьлдиз, гьуьрметдивди рикIел хкизва ва кхьизва: “Заидиналай амукьнавай ирс чIехиди я. КьетIенди я. Халкьдин арадай фад акъатнатIани, Заидин Гьасанов гьикаятчи, шаир яз сагъ я”.
Лезги лирикадин устадрикай сад тир Шихнесир Къафланов виридаз шаир яз малум тир. КилигайтIа, адан къелемдикай гьикаяярни хкатна кьван. Адан архивдай къачунвай “Гуьлуьшана гайи бахт” гьикаяда чи хуьрерин 1970-йисарин уьмуьрдай къачунвай шикилрал чан хкизва, темпелвал, муьфтехурвал негьзава.
Журналди Гьажи Ильясован “Художникдин суьгьбетар” очерк гун давамарзава. Лугьун хьи, ху-дожник Сейфедин Сейфединован уьмуьрдай къачунвай ва ада рикIел хкизвай гьар са легьзе, кар, вакъиа, туьш хьун итижлубур, художникдин веревирдер таъсирлубур, фикир ийиз тадайбур я.
Вичин хатI авай шаир, писатель Абдул Фетягь чи арада амачиз хейлин йисар я. Адан “Космосдиз фена хтай лезги” юморескада хуьруьн жемят мацIахайвилиз кьил янавай, хайи хуьруьнвийрин дердийрикай хабар авачиз цаварай рахазвай «цIийи лезгийрал» хъуьрезва.
Шииратдин пайни жанлу эсерралди, авторри къарагъарнавай темайралди, чIалан устадвилелди, художественный образралди тафаватлу я. Дагъустандин халкьдин шаир Ханбиче Хаметовадин “Банидин моналог” (Бани — чан алай яд хъванвай, кьиникь тийижир къуш) шиир, Аллагьяр Абдулгьалимован “Ялна фикир дегьнейриз”, Вадим Жамалдинован “Зун уьмуьрдин лепедалла, гар хьана” умуми кьилер ганвай циклайрик акатнавай шиирар кIелзавайдан руьгьдик кужумдайбур я. Нумрада къаравилиярни ава.
Абад Азадов
