Чи ватанэгьлияр — гьар сана
Алай вахтунда Астраханда яшамиш жезвай чи ватанэгьли, профессор, РФ-дин лайихлу агроном, АПК-дин рекьяй Россиядин лайихлу къуллугъчи, Россиядин Естествознанидин Академиядин академик, РАН-дин член-корреспондент, “Теоретические и прикладные проблемы агропромышленного комплекса” ва “Успехи современного естествознания” журналрин редколлегиядин член, хуьруьн майишатдин илимрин доктор Шамил Байрамбегович Байрамбегов Хив райондин Хъукьварин хуьряй я. Ам 1948-йисан 1-августдиз дидедиз хьана.
1971-йисуз ада Дагъустандин хуьруьн майишатдин институтдин агрономвилин факультет куьтягьна. 1971-1972-йисара Советрин Армиядин жергейра къуллугъна.
1972-1973-йисара ада “Хивский” совхозда кьилин агрономвиле кIвалахна. Ам ВЛКСМ-дин Хив РК-дин секретарвиле хкяна. 1976-йисалай ада “ВНИИООБ” ФГБНУ-да сифте илимдин чIехи къуллугъчивиле, эчIелрихъ галаз женг чIугвадай сектордин, лабораториядин, набататар хуьнин отделдин заведующийвиле, илимдин агалкьунар ва хъсан тежриба кардик кутунин рекьяй директордин заместителвиле, илимдинни ахтармишунрин кIвалахрин рекьяй директордин заместителвиле, 2011-йисалай инихъ чилериз яд гунин рекьяй отделдин заведующийвиле кIвалахзава.
Хуьруьн майишатдин илимрин докторвилин диссертация 1999-йисуз хвена. Шамил Байрамбегович муаллимвилин 5 йисалайни гзаф ва илимдин кIвалахдин 45 йисалайни гзаф тежриба авай пешекар-алим я. Адан илимдин кIвалахар гзафни-гзаф хуьруьн майишатдин хиле технология вилик тухунихъ, набататар хуьнин къайдаяр арадал гъунихъ галаз алакъалу я.
Адан къелемдикай 400-далайни гзаф илимдин кIвалахар, гьа жергедай яз 10 монография, методикадин теклифрин 40 ктаб хкатнава. Бажарагълу алим набататрин цIийи ва хъсан сортар арадал гъунин рекьяй авторвилин 11 шагьадатнамадинни патентдин сагьиб я. Адан регьбервилик кваз хейлин алимри докторвилин ва кандидатвилин диссертацияр хвена.
Хуьруьн майишатда ишлемишдай набататар хуьнин серенжемрик кьил кутунай ам 2006-йисуз илимдинни техникадин рекьяй Астрахандин областдин губернатордин премиядиз лайихлу хьана. Алимди кхьей “Технология возделывания овощных и бахчевых культур в орошаемых условиях Нижнего Поволжья с применением пестицидов нового поколения” кIвалах 2006-йисуз хуьруьн майишатдин илимрин академиядин президиумди лап хъсанди яз тестикьарна.
Бажарагълу алимдин зегьметар РФ-дин хуьруьн майишатдин министерстводин, кьве сеферда Астрахандин областдин губернатордин, РАСХН-дин президиумдин, Астрахандин областдин Думадин, Астрахандин областдин хуьруьн майишатдин, илимдинни образованидин министерствойрин гьуьрметдин грамотайралди, Дагъустан Республикадин Кьилин чухсагъулдин чарчелди къейднава. Ам Ватандин вилик лайихлувилерай II дережадин, Астрахандин областдин вилик лайихлувилерай медалрин, и областдин губернатордин “Пешекарвилин лайихлувилерай” сейливилин лишандин сагьиб я.
Бажарагълу алимдихъ къуй сагъламвал ва илимдин рекье мадни еке агалкьунар хьурай!
К.Ферзалиев
