Алатай гьафтеда США-дин Мэриленд штатдин Оксон-Хилл шегьерда Урусатдин машгьур боксер Максим Дадашеванни Пуэрто-Рикодай тир Субриэл Матиасан бягьс кьиле фена. 11-раунд куьтягь хьайидалай кьулухъ, сагъламвилиз хьанвай зарар фикирда кьуна, Дадашеван командадин кьилевайбуру бягьс вахтунилай вилик акьалтIардай къарар кьабулна. Нетижада судьяйри гъалибвал Матиасаз гана.
ТАСС-ди хабар гузвайвал, гьеле гьасиррал аламаз садлагьана Максим Дадашеваз пис хьана. Сифте ам экъуьчна, гуьгъуьнлай вич-вичикай хкатна. “Тади куьмекдин” улакьдаваз боксер шегьердин “UM Prince George’s Hospital Center” университетдин медицинадин центрадиз агакьарна. Ахтармишунар кьиле тухвайла, Дадашеван мефт бягьсинин вахтунда гъутарин гьужумрикди дакIунвайди (отёк) тайин хьана. Духтурри тади гьалда спортсмендин кьил операция авуна.
Операциядилай кьулухъ малум хьайивал, мефтIедин дакIун алудун патал духтурар Дадашеван кьилин кIараб атIуниз мажбур хьана. Гьайиф хьи, духтуррин алахъунри са нетижани ганач: операция авурдалай къулухъ са шумуд югъ алатайла, боксер вич-вичел хтанач, адан рикI акъвазна.
28 йис хьанвай Максим Дадашев лезги тир. Ам вичин хизанни галаз Санкт-Петербургда яшамиш жезвай. Гьасиррал ада 14 бягьс кьиле тухвана. Ам 13 сеферда гъалиб, садра магълуб хьана.
“Лезги газетдин” редакциядин коллективди Максим Дадашеван хизанриз, вири мукьва-кьилийриз, дериндай хажалат чIугунивди, башсагълугъвал гузва.
«Лезги газет»
