Къизляр райондин Сар-Сар хуьре кардик квай дуьгуь гьасилдай “Нива” майишатда 40 агъзур тонндив агакьна дуьгуь хуьдай махсус чка (элеватор) эцигиз гатIуннава. Идакай ТАСС-ди хабар гузва.
Къейд ийин хьи, хуьруьн майишатдал машгъул жезвай карханадиз дуьгуь Египетдиз маса гудай фикирар ава.
Къизляр райондин администрациядин пресс-къуллугъдин малуматралди, алай вахтунда Египетдив дуьгуь агакьарунин жигьетдай рахунар кьиле физва. Районда дуьгуь цазвай майданарни 200 гектардин артухарнава. И кардихъ галаз алакъалу яз, цIи шазандалай гзаф бегьер кIватI хъийида. Лагьана кIанда, алай вахтунда Къизляр райондин дуьгуь гьасилзавай карханайри метягь Азербайжандиз, Тажикистандиз, Къиргъизиядиз, Узбекистандиз ва Урусатдин са жерге регионриз рекье твазва.
Сар-Сар хуьревай “Нива” ООО-дин генеральный директор Зигьидин Кьасумован гафаралди, дуьгуь хуьдай чка эцигун патал 1 гектар чил чара авунва. Эцигунрин кIвалахар карханадин хсуси такьатрихъ кьиле тухузва.
Лугьун лазим я, “Нива” ООО къуьл ва къунж (люцерна) гьасилунални машгъул жезва. Къенин юкъуз къуьл ва къунж цанвай майданри 3350 гектар тешкилзава.
«Лезги газет»
