2020-йисуз Дагъустанда гатфарин магьсулар 225 агъзур гектардин майданра цун пландик кутунва. И карда сифте чкадал цазвай тумарин ерилувилин месэла эцигнава, хабар гузва “Россиядин хуьруьн майишатдин центр” ФГБУ-дин РД-да авай филиалди.
“Россельхозцентрадин” Дагъустандин филиалдин тумчивилин отделдин делилралди, йисан сад лагьай кварталда 7,2 агъзур тонн тумарин ери ахтармишиз алакьнава. Абурукай 96,6 процентдин кьадарда авайбур еридин жигьетдай ийизвай истемишунриз жаваб гузвайбур ва кутугайбур яз гьисабнава.
Гьа са вахтунда, отделдин начальник Мурад Муртазалиева къейдзавайвал, республикада гатфарин цанар тамам майданра аваз цун патал лазим техилдин ва харарин кьадар 9,4 агъзур тонндиз барабар я.
“Ахтармишайла истемишунриз жаваб тагун себеб яз хкуднавай тумарин нукьсан адак зирзибил гзаф хьунихъ галаз алакъалу я”, — лугьузва ада.
РД-дин хуьруьн майишатдин ва недай суьрсетдин министерстводин делилралди, гатфарихъ цун патал республикадиз 73,7 агъзур тонн тумар, гьа жергедай яз 64,5 агъзур тонн цадай картуфар, 9,2 агъзур тонн техилдин, ягъ хкуддай культурайрин ва хъчарин тумар герек я. Республикадин майишатар хсуси тумаралди анжах 78,8 процентдин кьадарда аваз таъмин я.
РД-дин хуьруьн майишатдин министерстводин делилралди, 24-апрелдалди гатфарин тумар 107,1 агъзур гектарда цанва. И кар республикадин вири районра гъиле кьунва ва майданар йикъандавай-къуз гегьеншарзава. Йигин еришра аваз и кIвалах Сергокъала, Къарабудахкент, Къумтуркъала, Рутул, Буйнакск, ва Хасавюрт районра кьиле физва.
Алай йисуз репсубликада гьакIни 916 гектардин майданда багълар кутадайвал я. 829 гектарда и кIвалах кьилиз акъуднава. 2020-йисуз кутун фикирда кьунвай 1400 гектар уьзуьмлухрикай алай вахтунда 177,5 гектарда и кIвалах тамамарнава.
«Лезги газет»
