И йикъара Докъузпара райондин администрацияда МР-дин Кьил Абдурагьим Алискерован регьбервилик кваз кьиле фейи нубатдин совещанидал образованиди, кьилди къачуртlа, ЕГЭ-диз гьазурвал акунин месэлаяр веревирдна.

Совещанидин кlвалахда райондин кьилин заместитель Салигь Гьажимурадова, районда ЕГЭ кьиле тухунин пунктунин руководитель Агьмед Агьмедова, образованидин управленидин начальник Гъвейибег Шагьвеледова, и управленидин къуллугъчийри ва хуьрерин мектебрин директорри иштиракна.

Райондин Кьил А. Алискерова гьукуматдин сад тир имтигьанар вахкунин серенжемар райондин сергьятра къайда тирвал, лайихлудаказ кьиле тухунин важиблувиликай ихтилатна.

ЕГЭ-дин ППЭ-дин руководитель Агьмед Агьмедова имтигьанар кьиле тухунин къайдайрикай, алатай йисалай инихъ хьанвай цlийи дегишвилерикай ихтилатна. Ада и серенжемар «РФ-дин образованидин гьакъиндай» федеральный къанундал бинеламиш хьана, тешкилна кlанзавайдакай лагьана. Ада алава хъувурвал, ЕГЭ тухунихъ галаз алакъалу цlийивилериз талукь методикадин материалрихъ галаз вири мектебрин директорар танишарнава.

Райондин кьил А. Алискерова ЕГЭ кьиле тухудай пункт тир Цlийи-Каракуьредин мектебда техникадин жигьетдай гьихьтин гьалар аватlа Гъвейибег Шагьвеледовавай хабар кьуна.

«ППЭ-да компьютерар бес жезвач,  вири классра видеогуьзчивилин камераяр тайинарнава, амма гьахьдай чкада ва дегьлизда тайинарнавай камерайри кlвалахзавач, абур дегишар хъувун чарасуз я», — къейдна райондин УО-дин начальник Гъ.Шагьвеледова.

Райондин Кьили герек тир вири тадаракралди таъминарда лагьана. Ада ЕГЭ кьиле финин къайдадал вичини гуьзчивал тухудайди лагьана.

«Лезги газет»