Дербент шегьердин агьалийрин бахтуни гъана: абуруз мехъерик, мугьмандиз, суварик, гьакI кIвалахал физ хьайитIани, чпин акунар хъсан патахъ дегишардай, итимриз мекер къайдадиз гъидай устад дерлекчи авайди чизва. И хъсан пешекар, гьакI гуьгьуьлар ачухардай инсан Агъаев Гуьлверди Дербетович 1963-йисуз виликан Кьасумхуьруьн райондин Шихидхуьре дидедиз хьана. 8-класс акьалтIарайла, ам Дербентдин хуьруьн майишатдин техникумдин агрономар гьазурдай отделенидиз гьахьна. Анаг акьалтIарай 1982-йисуз адаз Советрин Армиядин жергейриз эверна. Зегьметдин рехъ ада 1984-йисуз Дербентдин “Электросигнал” заводда диспетчервиле кIвалахунилай башламишна.
Аял чIавалай адан рикI мекер туькIуьрунал алай. Хуьре вичин дустарин, къуншийрин, мукьва-кьилийрин мекер къайдадиз гъун адаз хуш тир. Армиядин жергейра авайлани, азад вахтунда ам юлдашрин къуллугъда акъваздай.
Хуьруьн майишатдин техникумда кIелнатIани, дерлекчивилин пешеди ам вичихъди ялна. Адаз вичикай халисан устад хьана кIанзавай. Гьавиляй ам 1987-йисуз Махачкъаладин чирвилер гудай комбинатдин дерлекчивилин курсариз гьахьна. Зур йисуз ана кIелна, пешекар дерлекчивилин диплом гъиле аваз, ам Дербентдин “Дом быта” идарада кIвалахал акъвазна.
1991-йисуз гьукуматдин идараяр чкIиз гатIунайла, и “тIегъуьн” ада зегьмет чIугвазвай комбинатдихъни галукьна. Сифте кьиляй ада вичи кIвалахзавай салон кирида кьуна. Дерлекчивиле адахъ хъсан тежриба хьанвай. Иниз килигна, дербентэгьлийри ам хушдиз кьабулни авуна, абурун арада ада гьуьрметни къазанмишна. Гуьгъуьнлай ада салон вичиз вахчуна, адаз “АгъаРус” тIвар гана. Ада ихтилат авурвал, тIварцIе вичин кьве веледдин тIварарин сифтегьан слогар ава.
Мадни малум хьайивал, Г.Агъаева музыкадин рекьени бегьерлудаказ зегьмет чIугуна. Ам чIехи далдамар (ударные инструменты) ядай вижевай устад я. Сифте ам мел-мехъеррик шегьерда авай музыкантрихъ галаз физ хьана. Гуьгъуьнлай ада вичин алакьунар “Аран”, “КИМ” ва “Аям” ансамблра къалурна.
2008-йисуз музыкадивай къерех хьана, Гуьлверди Агъаева дерлекчивилин кIвалах давамарзава. Намуслувилелди зегьмет чIугвазвайвиляй адахъ муьштерияр гзаф ава. Абуру, виликамаз зенг авуна, учир кьазва. Тади квай муьштерияр хьайила, лугьун чна, имтигьандиз, шад мярекатдиз вахтунда агакьна кIанзавайбурун гьалдин гъавурда акьуна, ада тади квайди ахъайдай вахт жагъурзава, садан кефини хазвач. Муьштерийрин патай рикIин сидкьидай сагърай лугьудай гафар ван хьайила, дерлекчи устаддин гуьгьуьлар цава жеда.
Гуьлверди Агъаев туькIвей хизандин кьил я. ЧIехи гада Агъади, дахдин пеше кьуна, чпин хсуси салонда дерлекчивал ийизва. Руслана Россиядин Армиядин жергейра контрактник яз къуллугъзава. Руш Гуьлнарадихъ вичин хизан ава.
Къуй куь хизанда берекатар, хушбахтлувал мадни артух хьурай!
Къагьриман Ибрагьимов
