Ван авуна

Авайвал  лугьун хьайитIа, заз Мердали Жалилован­ веревирдер пара кIанда, за абур, садни ахъай тийиз,­ гьар са нумрадай кIелзава. Ам хци кьатIунар авай, чIалан саки вири такьатар чизвай ва кхьинра ге­рек къайдада ишлемишзавай тежрибалу журналист я.

Веревирдер чи  тарихдихъ, чи ви­лик финихъ, бязи крар кьулухъ галамукьунихъ, фикир тагузвай важиблу месэлайрихъ, чи чIал хуьнихъ ва тийижирбуру чирунихъ, мадни маса важиблу месэлайрихъ галаз сих алакъада аваз, газет кIел­завайди са четинвални авачиз гъавурда акьадайвал кхьенва.

Ингье и йикъара хтай 39-нумрадин 4-чина авай “МефтIериз ем гьинай къачуда?” веревирдер чешне яз къалуриз кIанзава заз. Касди къарагъарнавай месэладин важиблувал, метлеблувал вуч я! Ана гьамиша чна чи гележег яз гьисабзавай акьалтзавай несилдикай, яни аялрикайни жаванрикай, абуруз гьа гъве­чIизамаз гун герек тир дуьз тербиядикай, и жигьет­дай жавабдарвал, диде-бубайрин хьиз, гьукуматдин хивени авайдакай ачухдиз лагьанва. За журналистдин фикиррин-веревирдерин­ тереф тамамвилелди хуьзва. ГьикI лагьайтIа, гьар са кар­диз вичин тайин вахт авайди я. Вахтунда авур кIва­лахди рикIни динжарда, чанни. Аялризни тербия вахтунда­ гун чарасуз я.

Авайвал лагьайтIа, алай вахтунда обществода аквадай хьтин крар ийизва. Пособияр, гузвай маса пулар артухарзава, цIийи мектебар, яс­лияр, спортдин имаратарни кардик кутазва. Амма гатун пуд вацра, кар-кеспи авачиз, куьчейра гьатзавай аялрин тербия, вердишвилер, зегьмет акун, адан къадир хьун квелди эвеззава?! Исятда авайди гьа компьютердин технология, телефон я. Абурни герек я, бес аялдиз суфрадик квай фу гьикI арадал гъизватIа, ам ни гьасилзаватIа, техилар битмишарзавай никIер, анра кIвалахза­вай комбайнияр, механизаторарни магьсулдарар мус аквада?

Виликрай  аялар пионеррин “Орленок”, “Артек”, “Декорек”, “Каспий”, “Самур” ва маса лагерриз физвай, чеб лигимарзавай, дуствал мягькемарзавай, производстводин зегьметдин лагерарни ачухзавай. Анризни агъзурралди аялар фидай. Садни нарази яз хкведачир. Перестройка жедалди гатун вахтунда аялар, кьилер кIватI хъийиз, никIе­риз, яр-емиш, майваяр кIватIиз багъларизни  салариз фидай, чпин гъилералди кIвалахар­дай абуру. Им, гьелбетда, аялрин къуват ишлемишун тушир­. Абур зегьметдихъ галаз­ вердишарун тир. Абу­руз­­ суьр­сет гьикI арадал гъизвайди ятIа, вилералди аквазвай, чпин жавабдарвални гьиссзавай.

Мадни лагьайтIа, мектебри, муаллимри, библиотекайри, клубри ая­лар художественный эсерар, зегьметкешрикай, игит пионеррикайни комсомолрикай ктабар кIе­лунал желбзавай. Гилани и кар лап чарасуз я. Ктабривай аялар яргъаз къакъатнава, лап адетдин бязи­ за­­­тIа­рикайни, гьеле чпиз чарасуз чир хьана кIанзавай, абуруз хабар авач. МефтIериз ем гьинай къведа?..

Гележегдин деринриз гьахьзавай и месэладиз районрин, республикадин, гьукуматдин сергьятрани килигун, вилик кутун девирди истемишзава.

Тербия инсандиз гьамиша герек, багьа я. Ам дарман хьиз гуз, я пу­лунихъ къачуз жедач. За журна­лист­дин фикиррин тереф тамамвилелди хуьзва.

Райсудин  Набиев, зегьметдин ветеран