Рутул райондин Хъуьлуьдрин хуьре 1926-йисуз совет арадал гъайила, адан председателвиле хейлин йисара Ахцегьрин милицияда кIвалахай Мегьамедов Абдурагьман тайинарнай. Ада а четин вахтунда и къуллугъ 1930-йисалди тамамарна. Абдурагьмананни Суваран хизанда кьуд хва — Мегьамед, Агьмед, Семед, Абил ва пуд руш хьана. Абдурагьман вичин къалин хизандихъай фад галатна, кIвалин вири къайгъуяр диде Суваран хиве гьатна. Абдурагьманан стха Имамаяни вичин хтулар чIехи авун патал гзаф зегьметар чIугуна. Агьмед Дербентдин педтехникумдин интернатдиз ракъурна. КIелунар куьтягьай жегьил Рутул райондин ИчIерин хуьруьн школадиз рекье туна.
Вичелай гъвечIи стхайриз, вахариз са кьас фу гун патал Мегьамед колхоздин лапагрив фена, адакай халис чубан хьана. Фашистрин Германияди чи ислягь уьлкведал гьужумай йисуз муаллим яз кIвалахзавай Агьмед фронтдиз тухвана. Са акьван вахт арадай фенач, чубандин чантани чумахъ кIвалин пипIез гадарна, пабни аял кIвале туна, Мегьамедни душмандин хуруз фена. Абурун гуьгъуьналлаз кIвале амай Семедни, Абилни фронтдиз рекье гьатна.
1913-йисуз дидедиз хьайи Мегьамедов Агьмед 1943-йисан майдиз гел галачиз квахьна. Адан тIвар “Эбеди яз рикIера” тIвар алай ктабда гьатна. Мегьамедакайни Абилакай лагьайтIа, са малуматни авач я кьейибурун, я гел галачиз квахьайбурун сиягьра, я винидихъ тIвар кьунвай ктабда абурун тIварар авач.
1941-йисан 28-декабрдиз къати ягъунрин цIуз аватай Семедан чапла кIвачел залан хер хьана, ам госпиталда къаткурна. 1942-йисан 27-майдиз набут аскер кIвализ ахъай хъувуна. КIвач бегьем чилик хкIу-риз тежезвай ам Сувар дидеди Ахцегьай Хъуьлуьдиз балкIандал алаз хканай.
Дяведин ва адалай гуьгъуьнин йисара фронтдай катнавай къачагъри хуьрерин агьалийриз къурхуяр гузвай, кIвалерай шейэр чуьнуьхзавай. Къачагърикай жемят хуьн патал Мегьамедов Семедав (ам са куьнихъайни кичIе, къурху авачир итим тир) райондин къенепатан органрин отделдай винтовка вугана. Ам иллаки гатун вахтунда чуьлда кIвалахзавай аялрин, дишегьлийрин, кьуьзуьбурун къайгъуда жедай. Дяведилай кьулухъ Семедакай ОТФ-дин заведующий, ахпа колхоздин складчи хьана. Дяведа хьайи хирери яваш-яваш чпин кар тавуна тунач: ам 1985-йисуз рагьметдиз фена.
Мегьамедов Абдурагьманан рухвайри Ватан хуьн патал чпин жегьил чанар къурбандна. Агьмедахъни Абилахъ чилел гел тадай кас-велед хьанач, Мегьамедахъ Буйнакс лугьудай тек са хва хьана. Адан рухваяр ва рушар хуьре, шегьерра яшамиш жезва. Семед Мегьамедовахъ 3 хвани 5 руш хьана. Абурухъни чпин кIвал-югъ, хизанар, аялар ава. Дуьз лагьайтIа, чаз, хуьруьнвийриз, Семед халу вичи къазанмишнавай шабагьар хурудал алаз акурди туш. Адахъ Яру Гъед, Ватандин дяведин II дережадин орденар, “Гьакъисагъ зегьметдай”, “Зегьметдин ветеран” медалар авай. Са хизандай кьуд стхади — Мегьамеда, Агьмеда, Семеда, Абила — Ватан душмандикай азад авуник еке пай кутуна. Абурун экуь къаматар хуьруьнвийрин рикIера эбеди яз амукьда.
С.-А. Абдурашидов
