ТАСС-ди хабар гайивал, Махачкъаладин Советский райондин суддин къарардалди “РД-дин чилер мелиорация ийидай ва хуьруьн майишатдин чилер целди таъминардай министерство” ФГБУ-дин директор Залкип Къурбанов кьве вацра — 22-мартдалди дустагъда тунва.
Къурбанов вичин къуллугъдин ихтияррин сергьятрилай элячIунихъ ва идан нетижада чIуру гьалар арадал атунихъ галаз алакъалу яз кьунва ва адалай уголовный дело къарагъарнава. Силисдин делилралди, 2017-йисуз ада вичин регьбервилик квайбурухъ галаз къанунсуз икьрарар кутIунна ва федеральный хсусиятда авай къуллугъчийриз гузвай кIвалер кьилди ксарин хсусиятдиз яна.
И икьраррин бинедаллаз Дагъустан Республикада авай Росимуществодин территориальный управленидин къуллугъчийри къанунсуздаказ винидихъ къейд авунвай кIвалер хсусиятдиз яна. Къурбанован гьерекатри бюджетдиз 30 миллион манатдин зиян гана.
Им Къурбанован гьакъиндай къарагъарнавай кьвед лагьай уголовный дело я. Адак гьакIни Талгинка вацIун ятар, къанал эгъуьнуналди, Октябрдин инкъилабдин тIварунихъ галай къаналдиз ахъаюнин гьакъиндайни тахсир кутазва. Къаналдай чиркин ятар Каспийск ва Избербаш шегьеррин агьалияр хъвадай целди таъминарзавай Рыбье вириз авахьна ва нетижада алатай йисан ноябрдин эхирра агъзурралди агьалияр вацралай виниз хъсан еридин яд авачиз амукьна.
«Лезги газет»
