Дагъустан Республикадин Госсекретарь Хизри Абакарова региондин Кьилин везифаяр вахтуналди тамамарзавай Сергей Меликован тапшуругъдалди республикадин духтуррив Россиядин Федерациядин Президентдин патай чухсагъулдин чарар вахкана. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
РикIел хкин, коронавирусдин тIугъвалдин вахтунда республикадин азарханайра ва госпиталра зегьмет чIугур Дагъустандай саки 2 агъзур духтур Россиядин Президентдин патай чухсагъулдин чарариз лайихлу хьана. Сергей Меликован тапшуругъдалди, абур медицинадин хиле зегьмет чIугвазвайбурув республикадин руководстводин векилри мукьвал вахтара вахкудайвал я.
“Заз куьне четин вахтунда куь кIвалахда къалурай жуьрэтлувиляй ва кьегьалвиляй квез вири дагъустанвийрин патай сагърай лугьуз кIанзава. Инсанар сагъарун патал квез куь къуватарни, сагъламвални гьайиф атанач. Куьнни начагъ хьана, амма сагъ хъхьайла, куьн мад кIвалахдив эхгечIна. Залан тIугъвалдихъ галаз тухузвай женгина куьн сифтегьан жергейра хьана ва куьне виниз тир пешекарвални инсанвал къалурна”, — лагьана духтуррихъ галаз кьиле фейи гуьруьшдал Хизри Абакарова.
Духтурри Госсекретардиз кIвалахдин рекье чпел ацалтай четинвилерикай лагьана. Абурун гафаралди, виридалайни четинди азарлуйрик чеб сагъ хъжедайдан жигьетдай руьгь кутун тир, гьикI хьи, инсандин вич сагъ хъхьунин умудлувилелай гзаф крар аслу я.
«Лезги газет»
