Республикадин милли библиотекада тежрибалу муаллим ва гьикаятчи Репия Къарибовадин цIийи ктабрихъ галаз таниш хьуниз талукьарнавай мярекат кьиле фена. Ам библиотекадин милли литературадин отделдин къуллугъчи Секинат Мусаевади ачухна ва ада Репия Къарибовадин уьмуьрдикай ва яратмишунрикай куьрелди суьгьбетна.
Р. Къарибова Дагъустанда ва Азербайжанда чапзавай «Лезги газет», «Эренлардин сес», «Дагъустандин дишегьли», «Самур», «Алпан» газетриз, журналриз акъатзавай эсерралди малум я. «Мавел» издательстводин типографияда адан «Бахтунин кьисмет» ва «Дуьньядин къужахда…» ктабар акъатнава.
«Бахтунин кьисмет» ктабда Къарибовадин гьикаяяр (лезги ва урус чIаларал) гьатнава. Абурун темаяр хайи ватандин, чилин къадир авай халкьдин уьмуьрдай къачунвайбур я.
Рахайбуру къейд авурвал, гьикаятчидин эсерра халкьдин темади кьилин чка кьазва. XIX-XXI асирра лезги кIвалера, хуьрера, районра кьиле фейи хейлин вакъиаяр жуьреба-жуьре яшарин, къуллугъдин игитрин уьмуьрдалди къалурнава. Ихьтин шикилар иллаки «Кьуд рехъ», «Бахтунин къимет», «Багьа хазина», «Гъурбатда», «Регьят пул» гьикаяйриз талукь я.
Филолог Сефият Къурбановади къейд авурвал, Къарибовадин гьикаяяр кIелиз эгечIайла, руьгьда са гьихьтин ятIани дегишвилер кьиле физвайди гьиссда. Жуваз жувни гьа мярекатрин, вакъиайрин иштиракчи хьиз жеда.
«Дуьньядин къужахда…» ктабдин метлеб лап екеди я. Репия Къарибовади адан жилдерик лезги халкьдин сивин яратмишунар кIватIнава. Халкьдин баядар, халкьдин манияр, кьилди гьа манийрин припевар, чи инсанри тунвай камаллу келимаяр (афоризмаяр), мисалар…
Халкьдин фольклор кIватI хъувун патал чи гзаф инсанри зегьмет чIугурди я. Репия Къарибовадини и кардик вичин пай кутунва. Кьуд цIарцIин баядрик, халкьдин манийрик икьван гагьди малум тушир, чапдиз акъат тавур эсерарни ква. Баядар «Ашкъидикай», «Къаргъишар», «Ватанпересвал», «Ишелар», «Даллаяр», «Пешеяр», «Алхишар», «Адетар», «Агьарар», «КIанивал», «Алай вахтунин лирлияр» паяриз чара авунва. И эсерри кIелзавайди чи улу-бубайрин, бадейрин ажайиб ва четин девирриз хутахзава.
Репия Къарибовадиз ктабар тебрик авуналди, абурукай чпин фикирар муаллим Гуьлуьзар Оружевади, РД-дин лайихлу муаллим Тамила Набиевади, «Лезги газетдин» сиясатдин отделдин редактор Нариман Ибрагьимова, Дагъустандин писателрин союздин лезги секциядин председатель Максим Алимова, шаир Фазил Асланова, муаллим Сефият Къурбановади, кьилин дережадин духтур ЦIийиварз Ибрагьимовади ва масабуру лагьана.
Шегьердин са шумуд школадин аялри лезги чIалал Къарибовадин шиирар кIелна. Манидар Гуьлназ Алибеговади шаирдин чIалариз теснифнавай мани лагьана.
Абад Азадов
