25-ноябрдиз Сергей Меликова ришветбазвилиз акси комиссиядин заседание кьиле тухвана. Идакай чаз РД-дин Кьилин пресс-къуллугъди хабар гана. Республикадин Кьили къейд авурвал, къайдаяр хуьдай органри ришветбазвилин дуьшуьшрин вилик пад кьуниз талукь серенжемар гзаф кьиле тухузва. Ада и жигьетдай муниципальный тешкилатрини кIвалахдиз фикир гун важиблу тирди лагьана, дяведин махсус серенжемда телеф хьайибурун хизанар, талукь къуллугъар, эвездин такьатар къачудайла, лутувилин алахъунар ийизвайбурал ацалтзавайдакай ихтилатна. «Ихьтин беябурчивилин делилриз чна вирида санал аксивал авуна кIанда», — кьетIендаказ малумарна С. Меликова.
Заседанидал яшайишдин кIвалерин рекьяй региондин госнадзордин нетижаяр ва и хиле ришветбазвилер арадал гъидай хаталувилер тIимиларунин серенжемар веревирдна.
«Алай вахтунда ришветбазвилихъ галаз алакъалу месэлаяр нетижалудаказ анжах къайдаяр хуьдай органри гьялзава: гьайиф хьи, талукь тахсиркарвал малумар тавунмаз, инсанди вичи ийизвай крар къанунсузбур тирди аннамишзавач», — къейдна региондин регьберди.
Дагъустанда яшайишдин кIвалериз талукь гуьзчивилин кIвалахдикай Госжилинспекциядин регьбердин везифаяр вахтуналди тамамарзавай Арсен Гьажиева ихтилатна. Малум хьайивал, гзаф мертебайрин кIвалерин умуми эменни хуьнин месэлаяр четинбур яз амукьзава, кьилди къачуртIа, электричестводалди, чимивилелди таъминарунихъ, и хилера аварияр арадал атунихъ галаз алакъалу месэлаяр. И жигьетдай 2024-2025-йисара Госжилинспекциядиз 7100-далай гзаф арзаяр атана, 5800-далай гзаф ахтармишунин серенжемар кьиле тухвана, санлай къачурла, 8,8 миллион манатдилай виниз административный жермеяр тайинарна.
А.Гьажиева ресурсралди таъминарзавай тешкилатри, муниципалитетри ва кIвалерин месэлаяр идара ийизвай тешкилатри коммунальный къуллугърай гьакъи гунин сад тир документ кардик кутуниз кьетIен фикир гун герек тирди лагьана. Исятда онлайн къайдада коммунальный къуллугърай гьакъи гунин кар тамамвилелди тешкилнавач.
Эхирдай С. Меликова къейдна хьи, ришветбазвилин гьерекатрин вилик пад кьунин карда агалкьунрик анжах саналди кIвалахунин нетижада умуд кутаз жеда. Гьукумдин жавабдар вири органри къайдаяр хуьдай органрихъ галаз нетижалудаказ, алакъалудаказ кIвалахна кIанзава.
С. Салимов
