Куьмек акъвазарзава

США-дин президент Д.Трампа, Киевди ислягьвилин рахунар давамаруниз майилвал ийидалди, Америкади Украинадиз военный рекьяй гузвай куьмек акъвазарзава. Идакай «РИА Новости» чешмеди хабар гузва.

Къейдзавайвал, ихтилат ийизвай куьмек вахтуналди тахвуникай физва. «Президентди ачухдаказ лагьана хьи, ада ислягьвилиз майилвалзава. Чаз чи шерикарни гьа ихьтин макьсаддиз майилвалзавайбур хьана кIанзава», — малумарзава Лацу кIвали.

Рададин депутатрикай сада США-ди Украинадиз ийизвай куьмекар акъвазарун Украина патал еке бедбахтвал яз гьисабна.

ТIуьн гузвай гъил кIасна

Лацу кIвалин пресс-секретарь К.Ливитта къейднавайвал, США ва америкавияр дяведиз пулунин куьмекар гудай кьван галатнава. «Президент Трампаз икьрар къуватда тваз кIанзава. Гьайиф хьи, аквадай гьаларай, Зеленскийдиз гьелилиг и кар кIанзавач», — лагьана ада.

Ливитта алава хъувурвал, Зеленскийди вичиз тIуьн гузвай гъил кIасна. Украинадин кьиле авайди чиликай хкуддай мядендин менфятлу затIарин патахъай савдадин икьрар кутIунунин мукьвал алай, амма ада «араба балкIандин вилик кутун» кьетIна.

3-мартдиз США-дин президентдин милли хатасузвилин рекьяй меслятчи М.Уолтца малумарайвал, Киевди ислягьвилин рахунар башламишдай вахт атанва. «Вахт и къалмакъал мидаим яз давамарунин терефдал алач. Америкадин халкьдин сабур сергьят авачирди туш. Абурун кисеярни, дяведин суьрсетни, игьтият патал хвенвай затIарни кьадар авачирбур туш…» — лагьана ада.

Махсус серенжемдикай

3-мартдиз РФ-дин оборонадин министерстводи раижай делилралди, махсус серенжем кьиле тухунив­ эгечIайдалай инихъ Россиядин Яракьлу Къуватри Украинадин 656 самолет ва 283  вертолет, зенитный ракетайрин 600 комплекс, пилот галачиз лув гудай 45174 аппарат, 21966 танк ва дяведин маса машинар, РСЗО-дин 1523  машин, артиллериядин ва маса 22215 яракь, военный махсус 32405 автомашин ­тергна.

«Лентар.ру» чешмеди «The New York Times (NYT)» газетдал асаслу яз къейдзавайвал, Америкади Украинадин яракьлу къуватриз гайи Abrams танкарин саки пудай кьве пай терг хьанва.

РФ-дин силисдин комитетдин председатель А. Бас­т­рыкина малумарайвал, 2022-йисан февралдилай Ук­раинади Россиядин 34 региондал гьужумна.

Австриядин МИД-дин виликан кьил К.Кнайслан фи­кирдалди, дяведин махсус серенжемда Россия гъа­либ хьанва. «РагъакIидай пата Россия дяведин майданда чукIурун ва адан дережа юкьван асирриндаз элкъуьрун патал вири алахъунар авуна, амма и кар кьилиз акъатнач… Зи фикирдалди, Россия гъалиб хьанва», — малумарна ада «ТАСС» чешмедиз.

Путинанни Эрдоганан гуьруьшдикай

Владимир Путин Туьркиядиз финиз гьазурвал аквазвани лагьана хабар кьурла, адан пресс-секретарь Д. Пескова жаваб гана: «Гьелелиг гьакъикъи меслятар авач, чи суьгьбетар вири дережайра давам жезва». Идакай «РИА Новости» чешмеди хабар гузва.

Пескова къейд авурвал, чи уьлкведин патай Р. Эрдоганазни теклифнава, гьабурун патай В. Путинавни теклиф агакьнава.

Жавабдин серенжемар

Пекинди 10-мартдилай США-дай агакьзавай метягьриз талукь яз алава пошлина кардик кутазва­. ­Китайдин финансрин министерстводин малумат «Лента.ру» чешмеди раижна.

Къейдзавайвал, къуьлуьз талукь пошлина 15 процентдикай ибарат я, якIуз, емишриз, салан майвайриз ва некIедин суьрсетдиз талукьбур — 10 процентдикай. Идалайни гъейри, милли хатасузвал хуьнин макьсаддалди, Китайди США-дин 15 тешкилат экспортдин кьетIен гуьзчивилик квай сиягьдик кутунва.

Къейд ийин, идалай вилик США-ди Китайдай агакьзавай метягьриз талукь харж (пошлина) кьве сеферда (10 процентдилай 20-дал кьван) артухарнай. Гила Китайдини жавабдин серенжем кьабулзава.

Гьазурайди — К.Ферзалиев